जळगाव मिरर | १३ ऑगस्ट २०२६
नाशिक सिंहस्थ कुंभमेळ्याच्या नियोजनाशी संबंधित कथित बनावट वर्क ऑर्डर प्रकरणावरून जळगावात राजकीय वातावरण तापले आहे. शिवसेना (उद्धव बाळासाहेब ठाकरे) पक्ष आणि महाराष्ट्र नवनिर्माण सेनेच्या वतीने गुरुवारी जिल्हाधिकारी कार्यालयासमोर अनोख्या पद्धतीने आंदोलन करण्यात आले. हातात साबण, सॅनिटायझर आणि भिंग घेऊन आंदोलकांनी कथित भ्रष्टाचाराविरोधात घोषणाबाजी करत प्रशासनाचे लक्ष वेधले.
नाशिक कुंभमेळ्याच्या कामांमध्ये बनावट वर्क ऑर्डर तयार करून प्रशासकीय व आर्थिक गैरव्यवहार झाल्याचा आरोप आंदोलनकर्त्यांनी केला. या कथित गैरव्यवहाराचा निषेध करण्यासाठी आंदोलकांनी हातात साबण व सॅनिटायझर घेत ‘भ्रष्टाचार स्वच्छ करा’ असा संदेश दिला. तसेच भिंगाच्या माध्यमातून कुंभमेळ्याच्या कामकाजात पारदर्शकता आणण्याची मागणी करण्यात आली.
या कथित प्रकरणाची चौकशी करण्यासाठी मुख्यमंत्री आणि महाराष्ट्र शासनाकडे पत्रव्यवहार करण्यात आल्याचे आंदोलनकर्त्यांनी सांगितले. या प्रकरणाची तातडीने दखल घेऊन उच्चस्तरीय किंवा निवृत्त न्यायमूर्तींच्या अध्यक्षतेखाली निष्पक्ष चौकशी करण्यात यावी, अशी मागणी करण्यात आली.
तसेच चौकशी पूर्ण होईपर्यंत संबंधित मंत्र्यांनी नैतिक जबाबदारी स्वीकारून राजीनामा द्यावा, अशी मागणी शिवसेना आणि मनसेच्या पदाधिकाऱ्यांनी केली. बनावट वर्क ऑर्डर प्रकरणात दोषी आढळणाऱ्या सर्व संबंधितांवर कठोर कायदेशीर कारवाई करावी, अशीही मागणी करण्यात आली.
सिंहस्थ कुंभमेळ्यासारख्या मोठ्या धार्मिक आणि सार्वजनिक आयोजनाच्या कामांमध्ये कोणत्याही प्रकारचा गैरव्यवहार होऊ नये, यासाठी शासनाने कठोर पावले उचलण्याची गरज असल्याचे आंदोलकांनी सांगितले. कुंभमेळ्याच्या नियोजनातील प्रत्येक काम, त्यासाठी मंजूर निधी आणि वर्क ऑर्डर याबाबत पारदर्शकता ठेवावी, अशी मागणीही करण्यात आली.
या आंदोलनात शिवसेना उपजिल्हाप्रमुख प्रा. भाऊसाहेब सोनवणे, तालुकाप्रमुख प्रमोदभाऊ घुगे, मनसे जिल्हाध्यक्ष मुकुंद रोटे, शिवसेना महिला महानगरप्रमुख मनिषाताई पाटील, विनायक धर्माधिकारी, डॉ. रमाकांत कदम, प्रमोद सोनवणे, प्रभाकर कोळी, अशोक पाटील, प्रेमराज राठोड, किरण ठाकूर, महेश अहिरे, स्वप्निल राजपूत, किशोर धनगर, योगेश पाटील यांच्यासह मनसेचे सुनील सोनवणे, सागर जाधव, शैलेश चौधरी, तेजस कोळी, श्रीराम पाटील, चेतन पाटील, संकेत जाधव, गोपाल भारुडे, भरत पाटील, प्रशांत बाविस्कर, गणेश कुंभार, हेमंत कोळी, कुणाल पाटील, किरण सपकाळे, अनिल राठोड, बापू मेने, लखन पवार आदी पदाधिकारी व कार्यकर्ते उपस्थित होते.
