जळगाव मिरर | १७ ऑगस्ट २०२६
विवाहाच्या उद्देशाने लोकांना प्रभावित करण्यासह स्वतःची वेगळी ओळख निर्माण करण्याच्या प्रयत्नात एका २१ वर्षीय तरुणीने आधी महाराष्ट्र पोलिसांचा गणवेश परिधान करून छायाचित्रे काढली. त्यानंतर चक्क रेल्वे सुरक्षा दलाचा (आरपीएफ) गणवेश परिधान करून ती १५ ऑगस्ट रोजी जळगाव रेल्वे स्थानकावर पोहोचली. मात्र, आरपीएफ कर्मचारी असल्याचे भासवणारी ती अखेर तपासणीदरम्यान खऱ्याखुऱ्या आरपीएफ पथकाच्या नजरेत आली त्या तोतया आरपीएफ तरुणीचा पर्दाफाश झाला.
जळगाव रेल्वे स्थानकावरील प्लॅटफॉर्म क्रमांक तीनवर १५ ऑगस्ट रोजी ऑपरेशन सतर्क अंतर्गत सुरक्षा आणि दक्षता तपासणी सुरू असताना आरपीएफचा गणवेश परिधान केलेली एक तरुण महिला संशयास्पदरीत्या फिरताना कर्मचाऱ्यांच्या निदर्शनास आली. तिच्या गणवेशावरील नेमप्लेटवर होती. संशय आल्यानंतर आरपीएफ कर्मचाऱ्यांनी तिच्याकडे ओळखपत्र आणि नियुक्तीबाबत माहिती मागितली. मात्र, तिला अधिकृत ओळखपत्र सादर करता आले नाही.
तरुणीने आपण आरपीएफमध्ये कार्यरत असून आपली नियुक्ती नाशिक येथे असल्याचा दावा केला. तिच्या दाव्याची जळगाव येथील आरपीएफने नाशिक येथील संबंधित अधिकाऱ्यांकडून पडताळणी केली. मात्र, संबंधित नावाची कोणतीही महिला नाशिकमधील आरपीएफमध्ये कार्यरत नसल्याचे स्पष्ट झाले.
विवाहाच्या उद्देशाने लोकांना प्रभावित करण्यासाठी आणि दिशाभूल करण्यासाठी तिने यापूर्वी महाराष्ट्र पोलिसांचा गणवेश परिधान करून छायाचित्रे काढल्याचे चौकशीत सांगितले. त्यानंतर १५ ऑगस्ट रोजी आरपीएफचा गणवेश परिधान करून ती जळगाव रेल्वे स्थानकावर आली होती. विवाहासाठी स्वतःची ओळख किंवा प्रतिष्ठा वाढविण्याच्या उद्देशाने गणवेशाचा वापर केला जात होता का, याबाबतही तपास केला जात आहे. पोलिसांचा गणवेश परिधान करून छायाचित्रे काढल्यानंतर आरपीएफचा गणवेश घालून सार्वजनिक रेल्वे स्थानकात येण्यामागील नेमका उद्देश काय होता, याचाही तपास सुरू आहे.
महिलेच्या ताब्यातून बनावट चारित्र्य प्रमाणपत्र तसेच पोलीस पडताळणीची प्रत आढळून आल्याचे आरपीएफने सांगितले. त्यामुळे प्रकरणाचे गांभीर्य वाढले. आरपीएफने महिलेविषयीची माहिती आणि संबंधित कागदपत्रे पुढील कायदेशीर कारवाईसाठी जीआरपी, जळगावकडे सुपूर्द केली. या प्रकरणी जीआरपी, जळगावने संबंधित महिलेविरुद्ध एसीआर क्रमांक ६०७/२०२६, कलम २०४ बीएनएस, १५ ऑगस्ट २०२६ अन्वये गुन्हा नोंदविला आहे. पुढील तपास जीआरपीकडून सुरू आहे
