जळगाव मिरर | ११ नोव्हेंबर २०२६
धरणगाव तालुक्यातील हनुमंतखेडे येथे एका मुलाने स्वतःच्या वृद्ध आईची गळा चिरून हत्या केल्याची धक्कादायक घटना आज उघडकीस आली. शरीफा बी रसूल पटेल (वय ७०) असे मृत महिलेचे नाव असून, रशीद रसूल पटेल (वय ४५) हा या प्रकरणातील संशयित मुलगा आहे.
मिळालेल्या प्राथमिक माहितीनुसार, रशीद पटेल याने स्वतःच्या आईची गळा चिरून हत्या केल्याचा संशय व्यक्त करण्यात येत आहे. या घटनेची माहिती जावेद हुसेन पटेल यांच्या लक्षात आल्यानंतर त्यांनी परिसरातील नागरिकांना माहिती दिली. घटनेनंतर संशयित मुलगा घराबाहेर रडत बसल्याचेही सांगण्यात येत आहे. त्यानंतर स्थानिक नागरिकांनी तत्काळ पोलीस प्रशासनाला घटनेची माहिती दिली.
घटनेचे गांभीर्य लक्षात घेऊन पोलिसांनी घटनास्थळी धाव घेतली. आज वृत्त लिहिपर्यंत संशयित रशीद पटेल याला पोलिसांनी ताब्यात घेतले असून, गुन्हा नोंदविण्याची प्रक्रिया सुरू असल्याची प्राथमिक माहिती आहे. स्वतःच्या जन्मदात्या आईची अशा प्रकारे हत्या झाल्याच्या संशयाने हनुमंतखेडे परिसरात मोठी खळबळ उडाली आहे. आई-मुलाच्या पवित्र नात्याला काळिमा फासणारी ही घटना अत्यंत दुर्दैवी असून, या घटनेमुळे परिसरातून हळहळ व्यक्त होत आहे. या प्रकरणाचा पुढील तपास पोलीस करीत असून, हत्येमागील नेमके कारण तपासानंतरच स्पष्ट होणार आहे.
