जळगाव : प्रतिनिधी
आगामी काळात होणाऱ्या पोलीस भरती प्रक्रीयेत वय वाढवुन देण्याबाबतचे निवेदन नुकतेच जिल्हा दौऱ्यावर असलेले मुख्यमंत्री एकनाथ शिंदे यांना जळगांव येथील पोलीस बॉईज संघटनेच्यावतीने देण्यात आले आहे.
निवेदनात म्हटले आहे की, सन २०१९ पासून कोरोना महामारीमुळे महाराष्ट्र पोलीस दलात कोणत्याही प्रकारे भरती प्रक्रीया राबवण्यात आलेली नसुन भरती प्रक्रीयेत होत असलेल्या दिरंगाईमुळे पोलीस दलाचे स्वप्न बघणाऱ्या अनेक युवकांची स्वप्न अपूर्ण राहीलेली आहेत. भरती प्रक्रीयेत होत असलेल्या दिरंगाईमुळे बऱ्याच मुलांची वयोमर्यादा संपली असल्याने पोलीस दलाची स्वप्न बघणाऱ्या युवकांना त्यांच्या स्वप्नांपासून वंचीत राहावे लागले आहे.
त्यामुळे मुख्यमंत्री शिंदे यांना विनंती आहे की, कोरोना महामारीमुळे भरती प्रक्रीया घेता येत नसल्याने मागील सरकारने वाढीव वयाबाबत आदेश देखील निर्गमीत केलेले असुन आगामी काळात होत असलेल्या पोलीस भरती प्रक्रीयेत वयोमर्यादा पुर्ण करुन भरती प्रक्रीयेतून बाद झालेल्या युवकांना वाढीव वयाची अंतीम संधी देवून भरती प्रक्रीयेत सहभागी करुन घेण्यात यावे या आशयाचे निवेदन पोलीस बॉईज संघटनेच्यावतीने देण्यात आले आहे. या निवेदनावर गोकुळ कोळी, तुषार तायडे, हरीलाल कोळी, मितेश सपकाळे, नितीन कोळी, दीपक सोनवणे, दशरथ बाविस्कर यांच्या सह्या आहेत.
