जळगाव : प्रतिनिधी
शहरातील मोहाडी फाट्यावरील हॉटेल नेक्स्टमध्ये तरुणीच्या पार्टीसाठी गुरुवारी रात्री शहरातील दोन महाविद्यालयातील १२ तरुण तरुणी जमले होते. रात्री नऊ वाजता यातील एका तरुणाला बाहेर काढून २० ते २५ जणांच्या घोळक्याने बेदम मारहाण केली आहे. याप्रकरणी रात्री उशिरापर्यंत रामानंद पोलिस ठाण्यात गुन्हा नोंदवण्याची प्रक्रिया सुरू होती.
शहरातील महाविद्यालयातील पदव्युत्तर शिक्षण घेत असलेल्या मित्र मैत्रिणींचा ग्रुप आहे. यातील एका तरुणीचा गुरुवारी वाढदिवस होता. त्यासाठी हॉटेल गोल्डन नेक्स्ट येथे एक टेबल बुक केला होता. या ठिकाणी मित्र-मैत्रिणी जमले होते. केक कापून झाल्यानंतर मुलं ड्रिंक घेण्यासाठी वरच्या मजल्यावर गेले असता. शोएब हा एकटाच मुलींसोबत बसून होता. या वेळी अचानक २० ते २५ जणांचा घोळका या ठिकाणी आला. त्यांनी शोएबला मारहाण करत रूमच्या व हॉटेलच्या बाहेर रस्त्यावर आणून पुन्हा बेदम मारहाण केली. अचानक होणाऱ्या मारहाणीच्या प्रकाराने रस्त्यावर मोठ्या संख्येने बघ्यांनी गर्दी केली होती. या घटनेची माहिती पोलिसांना मिळाल्यानंतर रामानंद व एमआयडीसी पोलिसाच्या व्हॅन घटनास्थळी पोहोचल्या. त्यांनी जमाव पांगवले.
अप्पर पोलिस अधीक्षकांची भेट
घटनेची माहिती मिळताच अप्पर पोलिस अधीक्षक चंद्रकांत गवळी यांनी रामानंद पोलिस ठाण्यात जाऊन घटनेची माहिती घेऊन सूचना दिल्या. या वेळी पोलिस निरीक्षक विजय शिंदे, मुलींचे पालक उपस्थित होते. ही घटना घडली त्यावेळी शिवसेनेच्या शोभा चौधरी या उपस्थित होत्या. आपण जेवणासाठी आलो असल्याचे त्यांनी सांगितले. तर पोलिस ठाण्यात सरिता माळी या उपस्थित होत्या. दरम्यान, हॉटेलचे मालक पुनीत रावलानी यांनी तरुणाला मारहाण करत बाहेर नेले. हॉटेलच्या आवारात ही घटना घडली नसल्याचे सांगितले. पोलिसांना घटनेचे सीसीटीव्ही कॅमेऱ्याचे फुटेज देऊन सहकार्य केल्याचे सांगितले. रात्री उशिरा याप्रकरणी गुन्हा दाखल करण्याची प्रक्रिया सुरू होती.
मारहाणीत तरुण जखमी
दोन मारहाणीत शोएब पठाण हा गंभीर जखमी झाला. त्याच्या डोक्याला व कानामागे जखमा झाल्या आहेत. त्याला अगोदर गुलाबराव देवकर हॉस्पिटलला येथे नेण्यात आले. त्यानंतर त्याला शासकीय वैद्यकीय महाविद्यालयात आणण्यात आले. येथे वॉर्ड क्रमांक १ मध्ये त्याला दाखल करण्यात आले आहे.
