जळगाव : प्रतिनिधी
मोबाइलवर २० मिनिटात कर्ज’ या आशयाने आलेल्या संदेशात दिलेल्या लिंकवर जावून लोन अॅप डाऊनलोड करणे ३५ वर्षीय डॉक्टरला चांगलेच महागात पडले. मागणी न करताच कर्ज देऊन त्याच त्या व्यवहारात गुंतवून सुमारे साडेचार लाख रुपये डॉक्टरांकडून भामट्यांनी लुबाडले. त्यासोबत हे अॅप डाऊनलोड करताना मोबाइलमधील डाटा शेअरिंगचा एक्सेस दिल्याने डॉक्टर दाम्पत्याच्या फोटोशी छेडखानी करुन संपर्क यादीतील सर्वांना ते अश्लील फोटो व्हायरल करून बदनामी केली. या प्रकरणी जळगाव सायबर पोलिसात अज्ञाताविरुध्द गुन्हा करण्यात आला.
जामनेर येथील उपजिल्हा रुग्णालयात वैद्यकीय अधिकारी म्हणून कार्यरत असलेल डॉ. जितेंद्र प्रल्हाद वानखेडे (वय ३५, रा. संतोषी मातानगर, पहूर पेठ) यांना १६ डिसेंबर २०२१ रोजी बीएच ६७८३६२ या क्रमांकावरून ‘सुपर फास्ट लोन मिळवा, २० मिनिटात २० हजार मिळवा’ असा मेसेज आला. सोबतच http:/bit.ly/30hkPA2 ही लिंक आली. त्यानंतर पुन्हा ८ जुलै २०२२ रोजी http:/bitly/37549cc ही दुसरी लिंक आली. त्यांनी ती ९ जुलै रोजी ओपन केली. त्यात एक वेबपेज उघडले. त्यात Ram Loan नावाचे अॅप्लिकेशन उघडल्यावर माहिती देवाण – घेवाणबाबत Allow y Deny ऑपशन्स आले. ते त्यांनी प्रथम Deny केले. मात्र अॅप्लिकेशन न उघडल्याने Allow केले आणि तेच डॉक्टरांना महागात पडले. सोबत डॉक्टर वानखेडे यांनी अॅप्लिकेशनमध्ये वैयक्तिक माहिती, आधारकार्ड, पॅनकार्ड आदीसह स्वतःचा फोटो काढून अपलोड केला.
सोबत स्वतःच्या आयडीबीआय बँकेचा खाते क्रमांक आयएफसी कोडसह भरला. त्यांना तत्काळ तुमचे ३७५० रुपये कर्ज मंजुर झाल्याचा मेसेज आला. आणि येथून फसवणुकीला सुरुवात झाली. फोन पे अॅप्लिकेशनमध्ये रक्कम जमा झाल्याची दिसून आली. सोबत या कर्जाची परतफेड पाच दिवसाची असल्याचा मेसेज आला. चार दिवसात एका नंबरवरून मेसेज, व्हॉटसअप व्हाइस कॉल आले. त्यांना दहा वाजेच्या आत कर्ज भरुन नवीन वाढीव कर्ज काढा ते लगेच मंजूर होईल असे सांगितले.
तसे न केल्यास तुमचे अश्लील फोटो, आधारकार्ड, पॅनकार्ड संपर्क यादीतील लोकांना पाठवू अशी धमकी दिली. त्यानुसार डॉ. वानखेडे यांनी कर्ज व त्यावरील व्याज असे सात हजार रुपये फोन- पेच्या खात्यातून १० वाजेच्या आत भरले. त्यानंतर पुन्हा २/३ तासाने पुन्हा कर्ज घेण्यासाठी फोन आला. तेव्हापासून भामट्यांकडून सुरु असलेला हा सिलसिला २१ सप्टेंबर २०२२ पर्यंत सुरु आहे. ९ ते २१ सप्टेंबर २०२२ या कालावाधीत विविध लोन अॅपच्या माध्यमातून डॉ. वानखेडे यांना भामट्यांनी ६ लाख ८ हजार ७८५ रुपयांचे कर्ज वेळोवेळी देऊन त्यांच्या व त्यांच्या पत्नीच्या खात्यातू १० लाख ३२ हजार एवढी रक्कम खंडणी स्वरुपात वसूल करून त्यांना गंडवले.
