जळगाव मिरर | ३ ऑक्टोबर २०२४
यावल तालुक्यातील तालुक्यातील मोहराळा या माहेरी राहणाऱ्या एका २० वर्षीय विवाहित तरुणीने बुधवारी सायंकाळी गळफास घेतला. हा प्रकार निदर्शनास आल्यानंतर तिला तातडीने यावल ग्रामीण रुग्णालयात दाखल केले. परंतु, डॉक्टरांनी तपासणी करून तिला मृत घोषित केले. या तरुण विवाहितेने आत्महत्या का केली, याचे कारण मात्र कळू शकले नाही.
मिळालेल्या माहितीनुसार, चोपडा तालुक्यातील लोणी पंचक येथील विवाहिता सिमरन आकीब तडवी (वय २०) ही गेल्या काही दिवसांपासून यावल तालुक्यातील मोहराळा येथे माहेरी आली होती. दरम्यान, बुधवारी सायंकाळी सिमरनचे आई आणि वडील हे यावल शहरात आले होते. या वेळी ही तरुणी घरात एकटीच होती. याच काळात सिमरनने आपल्या घरी फवारणीच्या पंपाला बांधलेली पट्टीच्या साह्याने गळफास घेतला. हा प्रकार सायंकाळी सव्वाचार वाजता निदर्शनास आला. त्यानंतर तातडीने सिमरनला यावल ग्रामीण रूग्णालयामध्ये दाखल करण्यात आले.
या ठिकाणी वैद्यकीय अधिकारी डॉ. प्रशांत जावळे यांनी तपासणी करून सिमरनला मृत घोषित केले. या प्रकरणी यावल पोलीस ठाण्यात राजू तडवी यांच्या माहितीवरुन अकस्मात मृत्यूची नोंद करण्यात आली आहे. या घटनेचा तपास पो. नि. प्रदीप ठाकूर यांच्या मार्गदर्शनात पोलीस उपनिरीक्षक सुनील मोरे, सहायक फौजदार विजय पासपोळे, हवालदार राजेंद्र पवार करत आहेत. दरम्यान, घटनेची माहिती मिळताच यावल ग्रामीण रुग्णालयामध्ये पंचायत समितीचे माजी गटनेते शेखर सोपान पाटील, भाजप युवा मोर्चाचे माजी तालुकाध्यक्ष लहू पाटील यांनी धाव घेत मयत तरुणीच्या कुटुंबीयांना धीर दिला. दरम्यान, या तरुणीने आत्महत्या का केली, हे कळू शकले नाही. सिमरने आत्महत्या केल्यामुळे गावात हळहळ व्यक्त केली जात आहे.
