जळगाव मिरर | २२ नोव्हेबर २०२३
पारोळा तालुक्यातील सार्वे गावाजवळ भुसावळ येथून कंपनीतील काम आटोपून येत असताना कार दुभाजकावर आदळल्याने गुजरात राज्यातील दोन जणांचा जागीच मृत्यू झाला, तर एक जण गंभीर जखमी झाला. ही घटना मंगळवारी पहाटे तीन वाजेच्या सुमारास घडली.
मिळालेल्या माहितीनुसार, भुसावळ येथे कंपनीच्या कामानिमित्त दि. २० रोजी चालक अजय नरेंद्र कोकजे (६२, बडोदा), चेतन ताखासिंग राज (२७, भानपुरा, ता. अकलाव, जि. आनंद), तखासिंग उदयसिंग राज (६०, भानपुरा, ता. अकलाव) हे आपल्या गाडीतून (जीजे२३/सीई३६११) हे आले असून कंपनीचे काम संपवून दि. २१च्या पहाटे निघाले असता सार्वे गावानजीक राष्ट्रीय महामार्गावर पहाटे सव्वातीन वाजेच्या सुमारास हा अपघात झाला. चालक अजय कोकजे हे त्यांच्या ताब्यातील कार ही भरधाव वेगाने चालवत असताना रस्त्याचा अंदाज न आल्याने दुभाजकावर जोरदार आदळली. यात चालक अजय नरेंद्र कोकजे व चेतन ताखासिंग राज यांचा जागीच मृत्यू झाला.
तखासिंग उदयसिंग राज हे गंभीररीत्या जखमी झाले आहेत. यावेळी घटनास्थळी गावातील काही लोक, रुग्णवाहिका चालक ईश्वर ठाकूर, रोशन पाटील, यश ठाकूर, अमोल महाजन, शरद पाटील, यश गोसावी यांनी मृतदेह गाडीतून बाहेर काढले व जखमीला खासगी रुग्णालयात उपचारार्थ दाखल केले. यावेळी त्यांच्या अंगावर असलेली सोन्याची चेन रुग्णवाहिका चालकाने त्यांच्या नातेवाइकांना परत केली. गाडीचा वेग जास्त असल्याने दुभाजकावर ती इतक्या जोराने आदळली की गाडीच्या दोन्हीही एअर बॅग उघडूनही दोघांचे प्राण वाचू शकले नाहीत. याबाबत पारोळा पोलिसांत श्रीरंग अजय कोकजे यांच्या फिर्यादीवरून अपघाताचा गुन्हा दाखल करण्यात आला आहे. पुढील तपास पोलिस उपनिरीक्षक राजू जाधव करीत आहेत.
