जळगाव मिरर | ९ फेब्रुवारी २०२६
पाचोरा तालुक्यातील नगरदेवळा येथे गुन्हेगारांची हिंमत इतकी वाढली आहे की, आता थेट कायद्याचे रक्षण करणाऱ्या पोलिसांच्या घरालाच लक्ष्य केले जात आहे. मुंबई पोलिस दलात कार्यरत असलेले पोलीस उपनिरीक्षक देवेंद्र उमेशसिंग राऊळ यांच्या नगरदेवळा येथील राहत्या घरावर ७ फेब्रुवारीच्या मध्यरात्री अज्ञातांनी पेट्रोल टाकून जाळपोळ करण्याचा प्रयत्न केला. सुदैवाने, घरातील आईच्या सतर्कतेमुळे मोठा अनर्थ टळला.
मिळालेल्या माहितीनुसार, राऊळ गल्ली परिसरातील या घरात त्या वेळी पोलीस उपनिरीक्षक राऊळ यांची आई नंदकोर राऊळ आणि बहीण किरण राऊळ झोपलेल्या होत्या. मध्यरात्री सुमारे २.३० वाजता अचानक घराबाहेर हालचाल जाणवू लागली. त्याचवेळी पेट्रोलचा तीव्र वास आल्याने नंदकोर राऊळ जाग्या झाल्या. दरवाज्याजवळील पडदा पेट घेतलेला दिसताच त्यांनी तातडीने परिस्थिती ओळखली.
सुरुवातीला शॉर्टसर्किटमुळे आग लागल्याचा संशय होता; मात्र दरवाजा उघडताच बाहेर पेट्रोलची बाटली व आगपेटी दिसून आल्याने हा प्रकार जाणीवपूर्वक जाळपोळीचा प्रयत्न असल्याचे स्पष्ट झाले. नंदकोर राऊळ यांनी तत्काळ मुलगी किरणला उठवून पाण्याच्या साहाय्याने आग विझवली व आरडाओरडा करून शेजाऱ्यांना बोलावले. काही मिनिटांचा जरी विलंब झाला असता, तर संपूर्ण घर आगीच्या भक्ष्यस्थानी पडले असते.
घटनेची माहिती पोलीस उपनिरीक्षक देवेंद्र राऊळ यांनी मुंबईहूनच पाचोरा पोलीस दूरक्षेत्राला दिली. परिसरातील किराणा दुकानाच्या सीसीटीव्ही फुटेजमध्ये विना क्रमांकाच्या मोटारसायकलवर आलेले दोन अज्ञात इसम संशयास्पद हालचाली करताना स्पष्ट दिसत आहेत. गणपती मंदिराजवळ दुचाकी उभी करून ते गल्लीच्या दिशेने जाताना फुटेजमध्ये कैद झाले आहेत.
हा हल्ला पूर्णपणे नियोजित कटातून करण्यात आल्याचा संशय असून, आरोपींचा शोध घेण्यासाठी पोलिसांनी तपासाला वेग दिला आहे. या घटनेमुळे संपूर्ण नगरदेवळा परिसरात भीतीचे वातावरण निर्माण झाले असून, पोलिस अधिकाऱ्याच्या घरावर झालेला हा हल्ला अत्यंत गंभीर मानला जात आहे.
