जळगाव मिरर | ५ एप्रिल २०२४
जामनेर तालुक्यातील सुनसगाव येथील एका शेतात नर जातीचा बिबट्या मृतावस्थे आढळून आला आहे. या बिबट्याच्या मृतदेहाचे जागेवरच शवविच्छेदन करुन त्याच्यावर अंत्यसंस्कार करण्यात आले.
मिळालेल्या माहितीनुसार, तालुक्यातील सुनसगाव येथील गोपाल सीताराम पाटील यांच्या शेता (गट नंबर ८) मध्ये ४ रोजी सकाळी ९ वाजेच्या सुमारास ३ ते ४ वर्षाच्या नर जातीचा बिबट्या दिसल्याची चर्चा गावात पसरल्याने भीतीचे वातावरण निर्माण झाले होते. या घटनेची माहिती मिळताच माजी सरपंच दत्ता साबळे, पोलीस पाटील समाधान महाजन, बंडू पाटील, अनिल पाटील यांनी घटनास्थळी धाव घेऊन प्रत्यक्ष बिबट्याला जमिनीवर पडलेल्या अवस्थेत पाहिले. तर लगेच त्यांनी वनरक्षक अशोक ठोंबरे यांना फोन करून या घटनेची माहिती दिली. त्यानंतर वन विभागाचे अधिकारी व पशुसंवर्धन अधिकारी पोहोचले. त्यांनी बिबटयाला मृत घोषित करून बिबट्याच्या मृतदेहाचे जागेवरच शवविच्छेदन करून अंत्यसंस्कार केले.
दरम्यान, बिबट्याचा मृत्यू नेमका कशाने झाला, याचे कारण अद्यापही समजले नाही. तर आजारामुळ बिबट्याचा मृत्यू झाल्याचा प्राथमिक अंदाज डॉक्टरांकडून व्यक्त केला जात आहे. त्यांचे नमुने पुढील तपासणीसाठी प्रयोगशाळेत पाठवल्याची माहिती सूत्रांनी दिली. या वेळी सहाय्यक वनरक्षक उमेश बिराजदार, वनपरिक्षेत्र अधिकारी अमोल पंडित, वनपाल प्रशांत पाटील, प्रसाद भारूडे, वनरक्षक अशोक ठोंबरे, संदीप चौधरी, गणेश खंडारे, सुनील चिंचोले, पशुधन अधिकारी डॉ. योगेश किंगे, डॉ. भारती कुडील, मंगेश टाक, जीवन पाटील, विजय चव्हाण, वसंत शिसोदे, माजी सरपंच दत्ता साबळे, बंडू पाटील, पो.पा. समाधान महाजन, अनिल पाटील यांच्यासह ग्रा.पं. सदस्य व वन विभागाचे कर्मचाऱ्यांनी सहकार्य केले.
