जळगाव मिरर | ८ जून २०२५
पारोळा तालुक्यातील व विचेखडे गावाजवळ कारने दुचाकीला धडक दिल्याने झालेल्या अपघातात एक जण ठार तर दोन जण गंभीर जखमी झाल्याची घटना ४ रोजी घडली होती. या अपघातातील दुसरा जखमी तरुण रामा कौतिक कंडारे (वय १८) याचा ही धुळे येथे उपचारादरम्यान मृत्यू झाला. दरम्यान, कार चालकाला अटक न केल्याने संतप्त नातेवाईकांनी पोलीस ठाण्यात मृतदेह आणून काही वेळ आंदोलन केले. तर महिलांनी मोठा आक्रोश केला. ही घटना ७ रोजी सायंकाळी ६ वाजेदरम्यान घडली.
सविस्तर वृत्त असे कि, पारोळा तालुक्यातील विचखेडे गावाजवळ ४ रोजी सायंकाळी ७.३० वाजेच्या सुमारास पारोळा येथील विजय अंभोरे (वय २४), नितीन पगारे (वय २४) व रामा कौतिक कंडारे (वय १८) हे पल्सर कंपनीच्या दुचाकीने वसंतनगर येथे धार्मिक कार्यक्रमासाठी जात होते. यातच त्यांची गाडी नादुरुस्त झाली. तर ही गाडी लोटून आणत असताना मागून भरधाव वेगाने येणारी कार (एमएच ०१, एएक्स-९९१६) ने त्यांना जबर धडक दिली होती. त्यात तिघेही तरुण गंभीर जखमी झाले होते. तर विजय अंभोरे याचा वाटेतच मृत्यू झाला होता. दरम्यान, ७ रोजी पारोळा येथील रामा कौतिक कंडारे (वय १८) याचा धुळे येथे उपचारादरम्यान मध्यरात्री मृत्यू झाला.
दरम्यान, घटनेनंतर ३ दिवस उलटूनही संबंधित कार चालकाला अट-क न केल्याने संतप्त नातेवाईकांनी मयत तरुणाचा मृतदेह पारोळा पोलीस ठाण्यात आणून ठिय्या आंदोलन केले. संबंधित संशयित आरोपी हा पारोळा येथे आला असता त्यास सोडण्यात आले. परंतु, कुठल्याही प्रकारची कारवाई वा अटक केली नाही, म्हणून पारोळा पोलिसांवर या वेळी रोष व्यक्त करण्यात आला. तर नातेवाईकांनी या वेळी मोठा आक्रोश केला. या वेळी संपूर्ण समाज बांधव उपस्थित होते. पो.नि. सचिन सानप यांनी आरोपीस अटक करून कठोर कार्यवाही करू, असे आश्वासन दिल्यानंतर मृतदेह उचलण्यात आला. त्यानंतर रात्री ८ वाजता शोकाकूल वातावरणात अंत्यसंस्कार करण्यात आलेत.
