जळगाव मिरर | १८ ऑक्टोबर २०२४
भुसावळ शहरातील रेल्वेच्या नॉर्थ कॉलनीमधील रहिवासी सिद्धार्थ अनिल पवार (वय ३५) हे फुटबॉल कोच खेळाडूंना मैदानावर प्रशिक्षण देत होते. या वेळी विजेचे बटन सुरू करताना विजेचा जबर धक्का बसल्याने त्यांचा मृत्यू ओढवल्याची ही धक्कादायक घटना बुधवारी संध्याकाळी घडली.
मिळालेल्या माहितीनुसार, भुसावळातील डॉ. बाबासाहेब आंबेडकर मार्गावरील रेल्वेच्या नॉर्थ कॉलनीतील रहिवासी सिद्धार्थ पवार हे फुटबॉल खेळाडूंना प्रशिक्षण देण्यासाठी बुधवारी सायंकाळी मैदानावर गेले होते. सायंकाळी ५.४५ वाजेच्या सुमारास वीज पुरवठा सुरु झाल्यानंतर सिद्धार्थ पवार हे तेथील विजेचे बटन सुरू करत होते. याचवेळी त्यांना विजेचा जबर धक्का बसला. त्यानंतर त्यांना शहरातील खासगी रुग्णालयामध्ये उपचारासाठी दाखल केले. परंतु, डॉक्टरांनी तपासणी करुन त्यांना मृत घोषीत केले. या दुर्दैवी घटनेमुळे या भागात शोककळा पसरली आहे. याप्रकरणी मृत सिध्दार्थ पवार यांचे काका दिलीप पवार यांनी दिलेल्या माहितीवरून शहर पोलिसांत अकस्मात मृत्यूची नोंद करण्यात आली आहे.
पोलीस उपनिरीक्षक इक्बाल सय्यद, अब्दुल रज्जाक अब्दुल गनी, विकार शेख यांनी घटनास्थळाचा पंचनामा केला. तर उपनिरीक्षक इक्बाल सय्यद या घटनेचा तपास करत आहेत. दरम्यान, सिद्धार्थ पवार हे फुटबॉल कोच असल्याने त्यांच्या मृत्यूची माहिती मिळताच बहुसंख्य खेळाडूंनी रुग्णालयात धाव घेतली होती. याप्रकरणाची आरपीएफने ही नोंद केली आहे.
