जळगाव मिरर | १९ ऑक्टोबर २०२४
जिल्ह्यातील अनेक ठिकाणी अपघाताच्या घटना घडत असतांना दि.१८ रोजी जामनेर तालूक्यातील पहूर येथे अज्ञात वाहनाने दुचाकीस दिलेल्या धडकेमुळे झालेल्या अपघातात शेंदुर्णी येथील तरुणाचा दुर्दैवी मृत्यू झाल्याची घटना पहूर ते शेंदुर्णी मार्गावर असलेल्या घोडेस्वार बाबा दर्गाजवळ १८ रोजी सायंकाळी सव्वासहा वाजेच्या सुमारास घडली.
मिळालेल्या माहितीनुसार, शेंदुर्णी येथील दीपेश योगेश शिंपी (वय २३) व त्याचा मित्र अक्षय जितेंद्र जाधव (वय २१) हे दोघे दुचाकी (एमएच १९, डीयू – ६२५७) ने पहूरकडे येत होते. या वेळी घोडेस्वार बाबा दर्याजवळ अज्ञात वाहनाने त्यांच्या दुचाकीस जबर धडक दिली. या अपघातात दीपेश योगेश शिंपी याच्या डोक्याला गंभीर इजा होऊन मोठा रक्तस्त्राव झाल्याने त्याचा जागीच मृत्यू झाला. तर अक्षय जाधव यास गंभीर इजा झाली आहे.
या वेळी आजूबाजूच्या नागरिकांनी या तरुणांच्या नातेवाईकांना संपर्क केला. त्यानंतर दीपेश शिंपी यांस पहूर ग्रामीण रुग्णालयात दाखल करण्यात आले. तेथे वैद्यकीय अधिकारी डॉ. मयूरी पवार यांनी तपासणीअंती त्यास मृत घोषित केले. दरम्यान, गंभीर जखमी असलेल्या अक्षय जितेंद्र जाधव यास पाचोरा येथे खासगी रुग्णालयात उपचारार्थ दाखल करण्यात आले आहे. याप्रकरणी पहूर पोलीस ठाण्यात घटनेची नोंद करण्यात आली आहे. तपास पोनि सचिन सानप यांच्या मार्गदर्शनात विलास चव्हाण करत आहेत.
