जळगाव मिरर | १४ मार्च २०२६
शहरातील नित्यानंद नगरात राहणाऱ्या विकास बापू हटकर (वय २६) या तरुणाची कंपनीत नोकरीसाठी निवड झाली. परंतु ड्युटीवर हजर होण्यापुर्वीच त्याने धावत्या रेल्वेसमोर झोकून देत आत्महत्या केली. ही घटना शुक्रवारी पहाटे उघडकीस आली. या प्रकरणी तालुका पोलिस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, शहरातील नित्यानंद नगरमधील रहिवासी विकास हटकर हे पत्नीसह राहत होते. गेल्या अनेक दिवसांपासून ते रात्री घरी उशिरा येत होते. त्यामुळे ते कोणत्या तणावात आहे का, याचीही चिंता कुटुंबीयांना होती. विकास यांची काही दिवसांपूर्वीच जळगावातील एका खासगी कंपनीत नोकरीसाठी निवड झाली. तेथे ते काही दिवसात हजर होणार होते. मात्र त्यापूर्वीच ते गुरुवारी मध्यरात्री घरातून निघून गेले. त्यानंतर गिरणा पंपिंग रस्त्यावरील रेल्वे बोगद्याच्या काही अंतरावर जाऊन त्यांनी स्वतःला रेल्वे समोर झोकून दिले.
ही घटना लक्षात आल्यानंतर रेल्वे सुरक्षा बलाने तालुका पोलिसांना माहिती दिली. त्यावेळी तालुका पोलिस ठाण्याचे पोहेकॉ. धनराज पाटील व श्रीकांत बदर हे घटनास्थळी पोहचले. त्यांनी तरुणास शासकीय वैद्यकीय महाविद्यालय व रुग्णालयात दाखल केले असता डॉक्टरांनी मयत घोषित केले.
सुरुवातीला अनोळखी म्हणून मयताची नोंद करण्यात आली होती. मात्र घटनास्थळापासून काही अंतरावर दुचाकी लावलेली होती. पोलिसांनी सदर दुचाकीच्या क्रमांकावरून माहिती मिळविली व ती विकास हटकर यांची असल्याचे समोर आले. त्यावरून मयताची ओळख पटविण्यात आली. तसेच विकास हटकर यांचे वर्षभरापूर्वीच लग्न झाले असल्याचे त्याच्या नातेवाईकांनी सांगितले.
