जळगाव मिरर | ८ मार्च २०२६
जळगाव शहरातील नोंदणीकृत क्रीडा संस्थांवर लावण्यात येणारी घरपट्टी रद्द करण्यात यावी, अशी मागणी जळगाव जिल्हा रायफल असोसिएशनच्या वतीने शहराच्या महापौरांकडे करण्यात आली आहे. महापौरपदी निवड झाल्याबद्दल अभिनंदन करत असोसिएशनच्या पदाधिकाऱ्यांनी यासंदर्भात निवेदन सादर केले.
निवेदनात म्हटले आहे की, शहरातील क्रीडा संस्था या कोणत्याही प्रकारचा व्यावसायिक किंवा आर्थिक नफा मिळवण्याच्या उद्देशाने काम करत नाहीत. या संस्था लोकसहभागातून आणि अत्यल्प शुल्कात खेळाडूंना प्रशिक्षण देऊन त्यांना राज्य, राष्ट्रीय आणि आंतरराष्ट्रीय स्तरावर प्रगती करण्याची संधी उपलब्ध करून देतात. त्यामुळे या संस्थांवर घरपट्टीसारखा कर लादणे अन्यायकारक ठरू शकते.
क्रीडा संस्थांचे समाजातील योगदानही मोठे असल्याचे निवेदनात नमूद करण्यात आले आहे. समाजातील तळागाळातील मुलांना खेळाची संधी देत त्यांना व्यसनांपासून दूर ठेवणे आणि सुदृढ पिढी घडवण्याचे महत्त्वाचे कार्य या संस्था करीत आहेत. या माध्यमातून जळगाव शहर आणि जिल्ह्याचे नावही विविध स्पर्धांमधून उज्ज्वल होत असल्याचे सांगण्यात आले.
मात्र या संस्थांकडे आर्थिक उत्पन्नाचे ठोस साधन नसल्यामुळे घरपट्टीसारख्या कराचा बोजा सहन करणे त्यांना कठीण जात असल्याचेही निवेदनात नमूद करण्यात आले आहे. भविष्यात हा कर भरताना आर्थिक अडचणी निर्माण होऊन काही क्रीडा संस्था बंद पडण्याची शक्यता असून त्यामुळे अनेक खेळाडूंचे मोठे नुकसान होऊ शकते, अशी भीतीही व्यक्त करण्यात आली आहे.
या पार्श्वभूमीवर शहरातील नोंदणीकृत क्रीडा संस्थांना महानगरपालिकेकडून आकारण्यात येणाऱ्या घरपट्टी करातून कायमस्वरूपी सूट देण्यात यावी, अशी नम्र विनंती असोसिएशनच्या वतीने करण्यात आली आहे. महापौरांनी या मागणीचा सहानुभूतीपूर्वक विचार करून क्रीडा क्षेत्राला बळ देणारा निर्णय घ्यावा, अशी अपेक्षा व्यक्त करण्यात आली आहे. हे निवेदन जळगाव जिल्हा रायफल असोसिएशनचे सचिव व मुख्य प्रशिक्षक दिलीप लक्ष्मण गवळी यांनी सादर केले.
