जळगाव मिरर | १३ नोव्हेबर २०२३
अभिनेता सलमान खानचा चित्रपट येण्याआधीच चाहत्यामध्ये मोठा उत्साह असतो, यंदा दिवाळीच्या दिवशी अभिनेता सलमान खानच्या टायगर-3 या नव्या चित्रपटचा शो प्रदर्शित झाला आहे. काही प्रेक्षकांनी चित्रपटगृहात फटाके फोडून गोंधळ घातल्याची घटना लक्ष्मीपूजनाच्या दिवशी मालेगावमध्ये घडली. या विचित्र घटनेमुळे या चित्रपटाचा खेळ अर्ध्यावरच बंद करावा लागला.
सलमान खानचा टायगर-3 चित्रपट नुकताच प्रदर्शित झाला. रविवारी रात्री या चित्रपटाचा खेळ मालेगाव येथील मोहन एका चित्रपटगृहात सुरू होता. हा खेळ ऐन रंगात आला असताना काही प्रेक्षकांनी अचानक चित्रपट गृहातच फटाके फोडण्यास सुरुवात केली. यावेळी रॉकेट्सही सोडण्यात आले. हा प्रकार जवळपास 10 मिनिटे सुरू होता. यामुळे चित्रपट पाहण्यासाठी आलेले प्रेक्षक गोंधळून गेले. अनेक जण स्वतःचा जीव वाचवण्यासाठी इतरत्र धावताना दिसून आले. या घटनेचा एक व्हिडिओ सोशळ मीडियावर चांगलाच व्हायरल झाला आहे.
विशेष म्हणजे छावणी पोलिस ठाण्यापासून अवघ्या हाकेच्या अंतरावर असणाऱ्या चित्रपटगृहात हा प्रकार घडला. यासंबंधीच्या वृत्तानुसार, मालेगावातील चित्रपट गृहात फटाके फोडण्याची ही काही पहिलीच वेळ नाही. कारण, येथे सलमान खान व शाहरूख खानच्या चाहत्यांची संख्या मोठी आहे. या दोघांच्या चित्रपटाला येथे नेहमीच गर्दी होते. त्यात उत्साहाच्या भरात असे प्रकार घडतात असे सांगितले जाते. सलमानच्या यापूर्वीच्या एका चित्रपटावेळीही असाच एक प्रकार घडला होता. रविवारी जवळपास 10 मिनिटे बॉम्ब, रॉकेट्स, फुलझाड व तत्सम फटाक्यांची चित्रपटगृहात आतषबाजी सुरू होती. बाल्कनीतील प्रेक्षक शिट्या वाजवून नाचत त्याचे समर्थन करत होते. दुसरीकडे, या घटनेची माहिती मिळताच रात्री 11.30 च्या सुमारास पोलिस चित्रपटगृहात दाखल झाले. काही वेळाने अग्निशमन दलाचा बंबही घटनास्थळी पोहोचला.
