जळगाव मिरर | ३० एप्रिल २०२६
अमळनेर तालुक्यातील नंगाव बु. येथील ग्रामपंचायत अधिकारी श्री. रविंद्र देविदास पवार (वय ४८) यांना ५० हजार रुपयांची लाच स्वीकारताना लाचलुचपत प्रतिबंधक विभागाने रंगेहाथ पकडले. या कारवाईमुळे परिसरात खळबळ उडाली आहे.
तक्रारदाराच्या नातलगांनी गावात १५ वा वित्त आयोगांतर्गत सीसी गटर बांधकाम व पेव्हर ब्लॉक बसविण्याची दोन कामे केली होती. या कामांचे सुमारे १२ लाख रुपयांचे बिल मंजूर करून देण्यासाठी संशयित आरोपी अधिकाऱ्याने ७ टक्के रकमेप्रमाणे ५४ हजार रुपयांची लाच मागितली होती. तक्रारदाराने याबाबत २४ ऑगस्ट २०२६ रोजी लाचलुचपत प्रतिबंधक विभाग, जळगाव येथे तक्रार नोंदवली. तक्रारीची पडताळणी केल्यानंतर आरोपीने लाचेची मागणी केल्याचे स्पष्ट झाले. त्यानुसार ३० ऑगस्ट रोजी सापळा रचण्यात आला. कारवाईदरम्यान आरोपीने तडजोडीअंती ५० हजार रुपये स्वीकारले. पंचांसमक्ष ही रक्कम स्वीकारताना त्यांना तात्काळ ताब्यात घेण्यात आले. या प्रकरणी अमळनेर पोलीस ठाण्यात भ्रष्टाचार प्रतिबंधक अधिनियम १९८८ अंतर्गत गुन्हा दाखल करण्याची प्रक्रिया सुरू आहे.
ही कारवाई पोलीस उपअधीक्षक श्री. योगेश ठाकूर यांच्या मार्गदर्शनाखाली, पोलीस निरीक्षक हेमंत नागरे, श्रीमती स्मिता नवघरे तर सापळा पथक पोउपनिरी/दिनेशसिंग पाटील, पोउपनिरी/सुरेश पाटील पोहेकॉ/बाळु मराठे, पोहेकॉ/किशोर महाजन, पोहेकॉ/सुनिल वानखेडे, पोकों/भुषण पाटील, पोकॉ/मनोज पाटील, पोकॉ/प्रणेश ठाकुर, पोकॉ/अमोल सुर्यवंशी, पोकॉ/सचिन चाटे यांनी केली. या घटनेमुळे ग्रामपंचायत स्तरावरील कामांमध्ये होत असलेल्या भ्रष्टाचारावर पुन्हा एकदा प्रश्नचिन्ह उपस्थित झाले असून, नागरिकांकडून कठोर कारवाईची मागणी होत आहे.
