जळगाव मिरर | २ सप्टेबर २०२४
कामावरून घरी जात असतांना धावत्या रेल्वेचा धक्का लागल्याने संजय दिनकर कोळी (वय ५१, रा. सुनंदिनी नगर) यांचा जागीच मृत्यू झाला. ही घटना रविवार दि. १ सप्टेंबर रोजी पहाटे साडेपाच वाजेच्या सुमारास उघडकीस आली. याप्रकरणी रेल्वे पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, शहरातील सुनंदिनी नगरात संजय कोळी हे आपल्या पत्नी व दोन मुलांसह वास्तव्याला होते. वेल्डिंग दुकान चालवून ते आपला उदरनिर्वाह करत होते. नेहमीप्रमाणे शनिवारी ३१ ऑगस्ट रोजी सायंकाळी साडेसात वाजता ते वेल्डिंगचे दुकान बंद घर तरून घराकडे निघाले होते. दरम्यान, जळगाव रेल्वे स्थानकाजवळील रेल्वे खंबा क्रमांक ४२१ जवळ धावत्या रेल्वेचा धक्का लागल्याने त्यांचा जागीच मृत्यू झाला. ही घटना दुसऱ्या दिवशी रविवारी १ सप्टेंबर रोजी पहाटे साडेपाच वाजेच्या सुमारास उघडकीला आले. त्यांच्या खिश्यातील कागदपत्राच्या आधारे त्यांची ओळख पटली आहे. या घटनेची माहिती मिळाल्यानंतर रेल्वे पोलीस कर्मचारी यांनी घटनास्थळी धाव घेवून पंचनामा केला व मृतदेह शासकीय वैद्यकीय महाविद्यालयात दाखल करण्यात आला.
