जळगाव मिरर | १० ऑक्टोबर २०२४
राज्यात विधानसभा निवडणुकीचे धामधूम सुरू झाली असून दुसरीकडे राज्यातील सत्ताधारी व विरोधक एकमेकांवर आरोप प्रत्यारोप करीत आहे. मात्र सध्या जळगाव शहर विधानसभा मतदारसंघांमध्ये देखील सर्वच इच्छुक उमेदवार शहरात प्रत्येक कॉलनी आपली ताकद वाढविण्यासाठी जोर देऊ लागले आहे. तर शहरातील मुख्य चौकात या सर्व उमेदवारांकडून बॅनरबाजी देखील मोठ्या प्रमाणात करण्यात येत आहे. मात्र अद्याप कुठल्याही पक्षाने अधिकृत उमेदवार जाहीर न केल्याने जळगाव शहरात चार ते पाच नावाची सध्या जोरदार चर्चा सुरू झाली आहे.
जळगाव शहर विधानसभा मतदारसंघासाठी यंदा अनेक उमेदवार मैदानात उतरण्याची दाट शक्यता आहे. जळगाव जिल्हा नेहमीच भाजपचा बालेकिल्ला म्हणून प्रसिद्ध असून यंदा देखील भाजपचा बालेकिल्ला राहतो की यात दुसरा कोणी उमेदवार मैदान मारतो हे मात्र येणारा काळ ठरवत असला तरी जळगाव शहरातील भारतीय जनता पार्टीत सध्या अनेक दावेदार मैदानात उतरण्यासाठी सज्ज झाले आहे. तर दुसरीकडे महाविकास आघाडीतर्फे देखील काही नेत्यांची नावे चर्चेत येत आहे. महाविकास आघाडी व महायुती मध्येच यंदाच्या निवडणुकीत तगडी लढत होणार असल्याचे सध्या चित्र जळगाव शहरात निर्माण झाले आहे.
जळगाव शहर विधानसभा मतदारसंघात भाजपतर्फे विद्यमान आमदार राजूमामा भोळे, माजी उपमहापौर डॉ.अश्विन शांताराम सोनवणे तर महाविकास आघाडीतर्फे माजी महापौर जयश्रीताई महाजन, माजी उपमहापौर कुलभूषण पाटील यांचे नाव सध्या जळगाव शहर विधानसभा मतदार संघात जोरदार चर्चेत असले तरी महायुती व महाविकास आघाडी कुणाला उमेदवारी देते यावर विजयाचे गणित अवलंबून राहणार आहे.
उमेदवारांच्या पायाला लागली भिंगरी
जळगाव शहर विधानसभा मतदारसंघासाठी इच्छुक उमेदवारांनी यंदाच्या नवरात्र उत्सवात प्रत्येक मंडळात भेट देऊन आपले भाषण देऊन नागरिकांना आपला पॅटर्न काय असेल याची माहिती देत विजयादशमी व दिवाळीच्या शुभेच्छा देऊन प्रत्येक मंडळात फिरू लागले आहे. त्यामुळे उमेदवारांच्या पायाला जणू भिंगरी लागली असल्याचे सध्या चित्र जळगावकर पाहू लागले आहे.
तरुण मतदार ठरवणार जळगाव शहराचा आमदार कोण?
शहरातील अनेक तरुणांचे वय मतदान करण्याजोगते झाले आहे. त्यामुळे आगामी विधानसभा निवडणुकीमध्ये तरुण तरुणी मोठ्या प्रमाणात मतदान करून जळगाव शहरातील कुठल्याही एक उमेदवाराला आमदार निश्चित करू शकतात हे मात्र निश्चित
