जळगाव मिरर | ४ मार्च २०२६
जळगाव शहरातील निवृत्ती नगर परिसरात घरफोडीची धक्कादायक घटना उघडकीस आली असून नातेवाईक असलेल्या अज्ञात व्यक्तीने घरात प्रवेश करत सव्वा लाखांहून अधिक किमतीचे सोन्याचे दागिने लंपास केल्याचा प्रकार समोर आला आहे. याप्रकरणी जिल्हापेठ पोलीस ठाणे येथे गुन्हा दाखल करण्यात आला आहे.
मिळालेल्या माहितीनुसार, निवृत्ती नगरात राहणाऱ्या लताबाई पंडित सपकाळे (वय ५३) या आपल्या कुटुंबासह वास्तव्याला आहेत. ३ ते ७ फेब्रुवारीदरम्यान नातेवाईक असलेल्या अज्ञात व्यक्तीने त्यांच्या घरातून सुमारे सव्वा लाख रुपये किमतीचे सोन्याचे दागिने चोरून नेल्याचे उघड झाले. घरातील दागिने गायब झाल्याचे लक्षात येताच सपकाळे यांनी तत्काळ पोलिसांत धाव घेत तक्रार दाखल केली. संबंधित व्यक्तीला घरातील परिस्थितीची माहिती असल्याचा संशय व्यक्त करण्यात येत आहे. पोलिसांनी अज्ञात व्यक्तीविरोधात गुन्हा दाखल करून तपासाला सुरुवात केली आहे. या प्रकरणाचा पुढील तपास महिला पोलीस अंमलदार अनिता वाघमारे करीत आहेत.
दरम्यान, या घटनेमुळे परिसरात खळबळ उडाली असून नागरिकांनी घरात येणाऱ्या-जाणाऱ्या व्यक्तींविषयी सतर्क राहण्याची गरज व्यक्त केली आहे. पोलिसांकडून संशयितांचा शोध घेण्याचे काम सुरू आहे.
