जळगाव मिरर | १२ एप्रिल २०२६
शास्त्रीनगर, रामानंद नगर परिसरातील श्री स्वामी समर्थ सेवा केंद्र दिंडोरी प्रणित येथे श्री स्वामी समर्थ यांच्या पुण्यतिथीनिमित्त अखंड नामजप यज्ञ सप्ताह व श्री गुरुचरित्र सामूहिक पारायण सोहळ्याची भक्तिमय वातावरणात सुरुवात झाली आहे. या धार्मिक उपक्रमाला परिसरातील भाविकांचा उत्स्फूर्त प्रतिसाद मिळत आहे.
या सोहळ्यात दररोज २५ ते ३० सेवेकरी सामूहिकरित्या श्री गुरुचरित्र पारायणात सहभागी होत आहेत. सकाळी औदुंबर वृक्षाची प्रदक्षिणा घालून पहाटे ६ ते ८ या वेळेत सामूहिक पारायण वाचन केले जाते. त्यानंतर सकाळी ८ वाजता भूपाळी आरती तर सकाळी १०.३० वाजता नैवेद्य आरती करण्यात येते.
यज्ञ सप्ताहादरम्यान विशेष याग, नैवेद्य व आरती असे विविध धार्मिक कार्यक्रम नित्यनेमाने पार पडत आहेत. दरम्यान, आज चंडीयाग यज्ञ सेवा मोठ्या भक्तिभावाने पार पडली. संपूर्ण सप्ताहभर ही सेवा जनकल्याण, देशावरील संकट निवारण तसेच सर्वांना सुख-समाधान लाभावे, या उद्देशाने आयोजित करण्यात आली आहे.
या उपक्रमात शास्त्रीनगर केंद्रातील सर्व सेवेकरी सक्रिय सहभाग नोंदवत असून परिसरात भक्तिमय वातावरण निर्माण झाले आहे. तरी या धार्मिक सेवेचा लाभ घेण्यासाठी परिसरातील नागरिकांनी मोठ्या संख्येने उपस्थित राहावे, असे आवाहन आयोजकांतर्फे करण्यात आले आहे.
