जळगाव मिरर | ३० नोव्हेंबर २०२५
जिल्ह्यातील पाचोरा तालुक्यातील वाघुलखेडा या मूळगावी परतणाऱ्या दाम्पत्याचा मुंबई ते नागपूर राष्ट्रीय महामार्गावरील वडनेर भोलजी शिवारात कार विहिरीत कोसळून दुर्दैवी मृत्यू झाला. २८ नोव्हेंबर रोजी सायंकाळी साडेपाचच्या सुमारास ही दुर्घटना घडली. २९ नोव्हेंबरच्या सायंकाळी सात वाजेच्या सुमारास दोघांचेही मृतदेह बाहेर काढण्यात आले. या घटनेमुळे सर्वत्र हळहळ व्यक्त होत आहे.
सविस्तर वृत्त असे कि, पद्मसिंग दामू पाटील (वय ४९) व नम्रता पद्मसिंग पाटील (वय ४५) असे मृत्युमुखी पडलेल्या दाम्पत्याचे नाव आहे. पद्मसिंग पाटील हे तेलंगणमधील सीतापुरम येथे सिमेंट कंपनीत नोकरीत असल्याचे समजते. पाटील दाम्पत्य २७नोव्हेंबरला लग्न सोहळ्याकरिता तेलंगण येथून कार (क्रमांक एमएच-१३-बीएन-८५८३) ने गावाकडे परतत होते. विदर्भातील बुलढाणा जिल्ह्यात प्रवेश केल्यानंतर नांदुरा तालुक्यातील वडनेर भोलजी शिवारात नियंत्रण सुटून त्यांची कार महामार्गाला लागून अगदी दहा-पंधरा फूट अंतरावर असलेल्या विहिरीत कोसळली.
पाटील पती-पत्नी घरी पोहोचले नाहीत म्हणून कुटुंबीय चिंतेत होते. त्यांचा शोध घेण्यात आला, परंतु ते सापडले नाहीत. त्यांची कारही आढळून आली नाही. नातेवाइक संदीप रमेश पाटील यांनी नांदुरा पोलिस ठाण्यात २८ नोव्हेंबरला मिसिंगची तक्रार दाखल केली. त्यांच्या मोबाइलचे शेवटचे लोकेशन वडनेर भोलजी शिवार दर्शविले. त्यांचे काय झाले असावे? या शिवारातून दोघेही अचानक बेपत्ता झाले, तेथेच मोबाइल बंद झाल्याने घातपाताचा संशय बळावला होता.
ओम साई फाउंडेशन रेस्क्यू टीमने तीन तासांच्या प्रयत्नानंतर सायंकाळी ७ वाजता पती पत्नीचा मृतदेह व कार विहिरीबाहेर काढली. ओम साई फाउंडेशनचे विष्णू धांडे, कमलेश बोके, अविनाश फेरण, कृष्णा वसोकार, वैभव रहाणे राहुल निमकर्डे, भगवान निलजे, गणेश ताठे, राहुल एकडे तसेच नांदुरा नगरपालिका अग्निशामन दलाचे कर्मचाऱ्यांनी कार व मृतदेह बाहेर काढण्यासाठी प्रयत्न केले.
पोलिसांनी लोकेशननुसार तपास सुरू केला. महामार्गालगत असलेल्या विहिरींचा शोध घेण्यात आला. अखेर साठ फूट खोल विहिरीतील पाण्यात बुडालेली कार आढळून आली. पोलिसांनी क्रेनच्या साह्याने २९ नोव्हेंबरला सायंकाळी चार वाजेपासून कार बाहेर काढायला सुरुवात केली. सायंकाळी सात वाजता कार बाहेर काढली असता त्यामध्ये दोघांचे मृतदेह आढळून आले.
