जळगाव मिरर | १२ मे २०२५
राज्यातील महायुती सरकारमधील जलसंपदा मंत्री तथा भाजपचे ज्येष्ठ नेते गिरीश महाजन यांनी पत्रकार अनिल थत्ते आणि राष्ट्रवादी काँग्रेसचे नेते एकनाथ खडसे यांच्याविरोधात अब्रू नुकसानीची नोटीस पाठवली होती. या प्रकरणात न्यायालयाने पत्रकार अनिल थत्ते यांना दणका दिला आहे. तसेच सर्व सोशल मीडियावरील व्हिडीओ हटवण्याचे आदेश देखील देण्यात आले आहे.
अनिल थत्ते यांनी एका व्हिडिओमध्ये महाजन यांचे एका महिला IAS अधिकाऱ्याशी संबंध असल्याचा आरोप केला होता. या आरोपांचा आधार घेत एकनाथ खडसे यांनीही महाजन यांच्यावर गंभीर टीका केली होती. त्यानंतर हे प्रकरण चांगलेच चर्चेत आले होते. त्यानंतर महाजन यांनी या प्रकरणी पत्रकार अनिल थत्ते आणि राष्ट्रवादी काँग्रेसचे नेते एकनाथ खडसे यांच्याविरोधात अब्रू नुकसानीची नोटीस पाठवली होती.
महाजन यांनी या आरोपांना खोटे आणि निराधार ठरवत, आपल्या सामाजिक प्रतिमेला हानी पोहोचल्याचा दावा केला होता. त्यांनी स्पष्ट केले की, कोणतेही ठोस पुरावे न देता केलेले हे आरोप स्वीकारार्ह नाहीत आणि त्यामुळे त्यांनी कायदेशीर मार्गाचा अवलंब केला आहे.
दुसरीकडे, अनिल थत्ते यांनी आपली भूमिका स्पष्ट करताना सांगितले की, त्यांच्या मूळ व्हिडिओचा राजकीय हेतूने विपर्यास करण्यात आला आहे. त्यांनी असेही नमूद केले की, त्यांच्या व्हिडिओतील विधाने सरळ आहेत आणि ते कोर्टात सिद्ध करण्यास तयार आहेत. तर दुसरीकडे एकनाथ खडसे यांनी मात्र, अद्याप आपल्याला कोणतीही नोटीस प्राप्त झाल्याचे नाकारले होते. त्यांनी म्हटले की, नोटीस मिळाल्या नंतरच ते यावर प्रतिक्रिया देतील, असेही माध्यमांना सांगितले होते.
या प्रकरणामुळे महाजन आणि खडसे यांच्यातील राजकीय संघर्ष पुन्हा एकदा उफाळून आला होता. दोघेही पूर्वी एकाच पक्षात असूनही, सध्या वेगवेगळ्या राजकीय पक्षांमध्ये आहेत आणि एकमेकांवर टीका करण्याची कोणतीही संधी सोडत नाहीत. या दोघांमधील वाद एकाच पक्षात असल्यापासूनच पाहायला मिळत आलेला आहे. आता हा राजकीय संघर्ष वैयक्तिक आयुष्यातही पहायला मिळत आहे.
