जळगाव मिरर | ४ मार्च २०२६
जळगाव शहरातील मास्टर कॉलनी परिसरात बुधवारी (४ मार्च) पहाटे ४ वाजता गोवंश वाहतूक करणाऱ्या संशयित वाहनावरून दगडफेक आणि तोडफोडीची घटना घडली. या घटनेमुळे परिसरात काही काळ तणावाचे वातावरण निर्माण झाले. घटनास्थळी वाहनांचे मोठ्या प्रमाणावर नुकसान झाले तर दोन तरुण जखमी झाले आहेत.
मिळालेल्या माहितीनुसार, अमळनेर पोलिसांना संशयित वाहनाबद्दल माहिती मिळाल्यानंतर त्यांनी अमळनेरपासून जळगावपर्यंत थरारक पाठलाग सुरू केला. जळगाव शहरातील आकाशवाणी चौकात पोहचल्यावर काही स्थानिक तरुणांनीही पोलिसांना मदतीसाठी वाहनाचा पाठलाग सुरू केला. पहाटे चार वाजेच्या सुमारास वाहन मास्टर कॉलनीत प्रवेश केल्यावर परिस्थिती चिघळली.
संशयित वाहन अडवल्यानंतर परिसरात संतप्त जमावाने दगडफेक सुरू केली. एका कारसह दोन दुचाकींचा मोठ्या प्रमाणावर तोडफोड करण्यात आला. घटनास्थळी आपल्या दुचाकी घेण्यासाठी आलेल्या दोन तरुणांवर हल्ला झाला. यामध्ये एका तरुणाच्या डोक्याला गंभीर दुखापत झाली असून दोघे जखमी जळगाव जिल्हा शासकीय वैद्यकीय महाविद्यालय व रुग्णालयात दाखल आहेत. घटनेची माहिती शहरात पसरताच काही हिंदुत्ववादी कार्यकर्त्यांनी जिल्हा रुग्णालय आणि पोलीस ठाणे परिसरात मोठी गर्दी केली. पोलिसांनी तात्काळ घटनास्थळी आणि संवेदनशील भागात बंदोबस्त वाढवला आहे. जळगाव एमआयडीसी पोलीस स्थानकात या प्रकरणी गुन्हा दाखल करण्याची प्रक्रिया सुरू आहे. पुढील तपास पोलीस करत आहेत आणि परिसरातील तणाव नियंत्रणात ठेवण्यासाठी सतत बंदोबस्त राखला जात आहे.
