जळगाव मिरर | १८ सप्टेंबर २०२३
जगभरातील अनेक मोठ मोठ्या शहरात फॅशन शो उत्साहात साजरा होत असतो. याठिकाणी रंगीबेरंगी, आकर्षक तर कधी चित्र-विचित्र कपड्यांमध्ये रॅम्पवॉक करणाऱ्या सुंदर मॉडेल्स डोळ्यासमोर येतात. कपड्यांसह सौंदर्याच्या वेगवेगळ्या छटा या फॅशन शोजमध्ये दिसत असतात.
सडपातळ बांधा, रेखीव सौंदर्य आणि अंगावर फॅशनेबल कपडे घालत रॅम्पवॉक करणाऱ्या मॉडेल्स आणि मागे वाजणारं संगीत हे सर्वांचंचं लक्ष वेधून घेत असतात. पण नुकताच पार पडलेल्या न्यूयॉर्क फॅशन वीकमध्ये असं काही घडलं, ज्यामुळे सर्वांनाच आश्चर्याचा धक्का बसला. याचं कारण येथे मॉडेल्स एकमेकींना चक्क चिखलात लोळवत होत्या. हे पाहिल्यानंतर अनेकांना नेमकं काय सुरु आहे हे समजत नव्हतं.
न्यूयॉर्क फॅशन वीकमध्ये मॉडल्स चिखलात लोळत ऐलेना वेलेजच्या नव्या कलेक्शनचं प्रदर्शन करत होत्या. यादरम्यान त्या चिखलात लोळत होत्या आणि एमेकींनाही लोळवत होत्या. हे पाहिल्यानंतर जणू काही त्या भांडत आहेत असंच वाटत होतं. कारण त्या पूर्णपणे चिखलात माखल्या होत्या. वेलेजने तिच्या स्प्रिंग/समर 2024 कलेक्शनचं प्रदर्शन करण्यासाठी अमेरिकेच्या बुशविकमधील एका सामान्य गोदामात फॅशन शो आयोजित केला होता. अनेकांच्या कल्पनेपासून हे दूर होते. त्यामुळे मॉडेलन्सना चिखलात लोळताना पाहिल्यानंतर हे कोणतंही भांडण नसून, थीम आहे हे समजण्यास त्यांना उशीर लागला.
