जळगाव मिरर | १६ जानेवारी २०२५
यावल शहरातील फैजपूर रस्त्यावर विस्तारित भागात असलेल्या हरी ओम नगरातील दुकानाला आग लागली. मंगळवारी पहाटे पूर्वी लागलेल्या या आगीत दुकानातील सर्व साहित्य जळून खाक होत तब्बल १४ लाखांचे नुकसान झाले आहे. या आगीचा फटका शेजारील घराला देखील बसला आहे. शेजारील घराच्या खिडकी, दरवाजे देखील जळून ३९ हजारांचे नुकसान झाले आहे. शॉर्टसर्किटमुळे आग लागली असावी, असा प्राथमिक अंदाज आहे.
सविस्तर वृत्त असे कि, संजेरी ग्लास या शेख जाकीर शेख कमरोद्दिन, शेख अलतमस शेख जाकीर यांच्या दुकानास ही आग लागली. तहसीलदार मोहनमाला नाझीरकर यांच्या सूचनेनुसार मंडळ अधिकारी मीना तडवी, तलाठी गजानन पाटील, प्रदीप पाटील, ज्ञानेश्वर पाटील यांनी याठिकाणी पंचनामा केला. या आगीमध्ये दुकानदाराचे १४ लाख ७ हजार रूपयांचे साहित्य जळाल्याचा पंचनामा करण्यात आला आहे. घटनास्थळी पंचायत समितीचे माजी गटनेचा शेखर पाटील, काँग्रेस आदिवासी सेल तालुका अध्यक्ष बशीर तडवी आदींसह विविध स्थानिक लोकप्रतिनिधींनी घटनास्थळावर भेट देऊन पाहणी केली.
या आगीमध्ये दुकानातील प्लाऊड तसेच अॅल्युमिनियमच्या खिडक्या, दरवाजे तयार करणारे व प्लाऊड कटिंग करणारे तसेच अॅल्युमिनियम कटिंग करणाऱ्या विविध प्रकारच्या मशिनरी तसेच अॅल्युमिनियमच्या सीट, प्लाऊडचे शीट, तयार झालेल्या खिडक्या दरवाजे, तसेच काच व फर्निचरचे आगीत नुकसान झाले. आग लागल्याचे निर्दशनास येताच अग्निशमन दलाला माहिती देण्यात आली. यावल नगरपालिकेचे अग्निशमन वाहनाचे चालक कैलास काटकर, फायरमन शाहरुख खाटीक, दिनेश घारू यांनी आग आटोक्यात आणली. मात्र, तोवर सर्व साहित्य जळून खाक झाले होते.
