जळगाव मिरर | १४ जानेवारी २०२४
जळगाव शहरातील एका परिसरात मैत्रीच्या बहाण्याने एका महिलेने ४८ वर्षीय पुरुषाला फ्लॅटमध्ये बोलवून या महिलेसह अन्य एका महिलेने व दोन पुरुषांनी मारहाण करत जबरदस्तीने अश्लिल व्हिडिओ तयार केले. तसेच ते व्हिडीओ व्हायरल करण्याची धमकी देत त्या पुरुषाजवळील ६५ हजारांचा ऐवज काढून घेत त्याच्याकडे ५० हजारांची खंडणी मागितली. ही घटना शुक्रवार दि. १२ जानेवारी रोजी तहसील कार्यालय परिसरात घडली, याप्रकरणी शहर पोलिस ठाण्यात दोन महिला व दोन पुरुषाविरुद्ध गुन्हा दाखल करण्यात आला आहे.
मिळालेल्या माहितीनुसार, उत्तरप्रदेशातील ४८वर्षीय परप्रांतिय ईसम कानळदा रोड परिसरात वास्तव्यास असून तो चालक म्हणून काम करतो. गेल्या दीड ते दोन महिन्यांपूर्वी त्यांना एका अनोळखी क्रमांकावरुन महिलेचा फोन आला. त्या महिलेने त्या इसमाला फोन करण्याचे सत्र सुरुच ठेवले. त्यानंतर दि. १२ जानेवारी रोजी दुपारी साडेबारा वाजेच्या सुमारास त्या महिलेला इसमाला पुन्हा फोन आला, महिलेने त्यांच्याशी ओळख करत मैत्रीच्या बहाण्याने त्याला तहसील कार्यालयाजवळील एका फ्लॅटमध्ये बोलवले. तो तेथे पोहचला त्या वेळी तेथे या महिलेसह २५ ते ३० वर्षीय आणखी एक महिला व दोन पुरुष होते. या सर्वांनी संगनमत करत चालकाला मारहाण केली व त्याच्यासोबत जबरदस्तीने शरीर संबंधाचे व्हिडिओ तयार केले.
चालकाचा जबरदस्तीने शरीरसंबंध केल्याचे व्हिडिओ मित्र व नातेवाईकांकडे पाठवण्याची धमकी देऊन चौघींनी चालकाकडे ५० हजार रुपयांची मागणी केली. हे पैसे वसूल करण्यासाठी त्याला आव्हाणे शिवारात घेऊन गेले. या प्रकरणी वाहन चालकाने शहर पोलिस ठाण्यात फिर्याद दिली. त्यावरून दोन महिलांसह दोन पुरुष असे चार जणांविरुद्ध गुन्हा दाखल करण्यात आला आहे. पुढील तपास सपोनि किशोर पवार करत आहेत.