जळगाव मिरर | १९ एप्रिल २०२५
दिल्लीतील मुस्तफाबाद येथे शुक्रवारी मध्यरात्री एक इमारत कोसळून मोठी दुर्घटना घडली. या अपघातात आतापर्यंत 4 जणांचा मृत्यू झाला असून 15 हून अधिक लोक जखमी झाले असल्याची माहिती समोर येत आहे. या इमारतीच्या ढिगाऱ्याखाली अनेक लोक दबल्याची माहिती मिळत आहे. घटनास्थळी एनडीआरएफची टीम दाखल झाली असून हा ढिगारा तातडीने हटवण्यासाठी सर्वतोपरी प्रयत्न केले जात आहेत.
या इमारतीत घटनेच्या वेळी सुमारे 24 जण ढिगाऱ्याखाली अडकले होते. त्यापैकी आतापर्यंत 18 जणांना बाहेर काढण्यात आले आहे. तर जखमींना रुग्णालयात दाखल केले आहे. अजूनही 10 हून अधिक लोक अडकल्याची शक्यता आहे. मुस्तफाबाद येथे सुरू असलेल्या बचाव कार्यात एकीकडे एनडीआरएफ आणि पोलिसांचे जवान कार्यरत आहेत, तर दुसरीकडे स्थानिक लोकही बचाव कार्यात मदत करत आहेत. घटनेनंतर इमारतीचा ढिगारा हटवण्यासाठी स्थानिक नागरिकही तिथे उपस्थित असलेल्या टीमांना सहकार्य करत आहेत.
स्थानिकांच्या मते, या इमारतीत तीन ते चार कुटुंबे राहत होती. ही चारमजली इमारत होती. यात भाडेकरू आणि मालक एकत्र राहत होते. दिल्लीचे विभागीय अग्निशमन अधिकारी राजेंद्र अटवाल म्हणाले, “आम्हाला पहाटे सुमारे 2:50 वाजता एक घर कोसळल्याची माहिती मिळाली. आम्ही घटनास्थळी पोहोचलो तेव्हा संपूर्ण इमारत कोसळलेली दिसली आणि लोक ढिगाऱ्याखाली अडकले होते. NDRF, दिल्ली अग्निशमन सेवा लोकांना वाचवण्यासाठी काम करत आहे.”दरम्यान, शुक्रवारी दिल्लीत हवामान अचानक बदलले होते. रात्री जोरदार पाऊस आणि वादळ आले, ज्याचा शहराच्या अनेक भागांवर परिणाम झाल्याचे पाहायला मिळाले.
