जळगाव : प्रतिनिधी
नुकतेच दि १४ रोजीच्या मध्यरात्री निलंबन झालेले एलसीबीचे तत्कालीन पोलीस निरीक्षक किरणकुमार बकाले यांच्याविरुद्ध जळगावच्या जिल्हापेठ पोलीस स्थानकात विविध कलमान्वये गुन्हा दाखल करण्यात आला आहे.
सविस्तर वृत्त असे की, विनोद पंजाबराव देशमुख (वय 49 वर्ष, व्यवसाय बांधकाम व्यावसायिक, रा. 12 मधुवन, महाराष्ट्र बँक कॉलनी, महाबळ रिक्षा स्टॉप जवळ, जळगाव) यांनी फिर्याद दिली आहे. श्री. देशमुख यांनी फिर्यादीत म्हटले आहे की, जळगाव जिल्हा पोलीस दलास व दलातील ब-याचशा पोलीस अधिकारी व पोलीस कर्मचारी यांना ओळखतो. त्यापैकी किरण कुमार बकाले पोलीस निरीक्षक स्थानिक गुन्हे शाखा, जळगांव यांना व्यक्तीशः ओळखतो. त्यांची व माझी लहान मोठ्या कार्यक्रमात भेट झाली आहे. तसेच स. फौजदार अशोक ओंकार महाजन नेम. स्थानिक गुन्हे शाखा, जळगांव यांना सुध्दा ओळखतो ते स्थानिक गुन्हे शाखा, जळगांव येथे हजेरी मेजर म्हणुन कर्तव्य पार पाडीत आहे. दरम्यान, एका व्हाटसअप ग्रुपवर 14 सप्टेंबर रोजी सायंकाळी ठिक 4 वाजता ग्रुपवर आलेली ऑडीओ क्लीप मी डाऊनलोड केली. ती 3.13 मिनीटांची असून ती क्लिप मी ऐकली असता, त्यामध्ये एक जबाबदार शासकीय नोकर असलेले किरणकुमार बकाले हे त्यांचे सहकारी पोलीस अंमलदार सफौ. अशोक महाजन यांच्याशी कामानिमीत्त चर्चा करत असताना मराठा समाजाबददल आक्षेपार्ह, घृणास्पद व स्त्रियांना लाज वाटेल असे बोलून मराठा समाजातील सर्व स्त्री पुरुष व लहान थोरांचा अपमान करून जातीय तेढ निर्माण होईल असे वक्तव्य केलेले आहे. बकाले है सरकारी नोकर व जबाबदार पदावर असतांना आपल्या सहकारी अमलदारांशी फोनवर बोलतांना मराठा समाजाबददल’ अतिशय घृणास्पद व आक्षेपार्ह वक्तव्य करून दोन समाजामध्ये द्वेष भावना वाढवण्याचा प्रयत्न केला व असे वक्तव्यामुळे सार्वजनिक शांतता भंग होण्याचा धोका निर्माण झालेला असल्याचे तक्रारीत नमूद आहे. याप्रकरणी किरणकुमार बकाले यांच्याविरुद्ध भादवी कलम १५३ अ. १५३ ब. १६६.२९४,५००, ५०९ प्रमाणे गुन्हा दाखल करण्यात आला आहे. दरम्यान, आधी एलसीबीतून उचलबांगडी त्यानंतर निलंबन आणि आता गुन्हा दाखल झाल्यामुळे किरणकुमार बकाले यांचा पाय आणाखी खोलात जात असल्याचे चित्र निर्माण झाले आहे.
