जळगाव मिरर | ६ मार्च २०२६
आखाती युद्धामुळे व्यावसायिक गॅस सिलेंडरच्या पुरवठ्यावर मोठा परिणाम झाला असून, पुण्यात व्यावसायिक सिलेंडरचे वाटप काही काळासाठी थांबवण्यात आले आहे. यामुळे हॉटेल्स, उद्योग आणि औद्योगिक वापरावर विपरीत परिणाम होण्याची शक्यता आहे, तर घरगुती गॅस सिलेंडरच्या वाटपाला सध्या प्राधान्य दिले जाणार आहे.
एचपीसीएल (HPCL) आणि बीपीसीएल (BPCL) या प्रमुख गॅस वितरण कंपन्यांनी त्यांच्या वितरकांना चाकण आणि शिरूर येथील प्लांटमधून सूचना दिल्या आहेत की, ५, १९, ३५, ४७ आणि ४२७ किलो वजनाच्या व्यावसायिक सिलेंडरच्या नवीन ऑर्डर सध्या घेऊ नयेत. पुढील सूचना मिळेपर्यंत वितरकांनी व्यावसायिक गॅससाठी वाहने पाठवू नयेत, असेही सांगण्यात आले आहे.
गॅस वितरण वितरक जीवन अल्हाट यांनी सांगितले की, “औद्योगिक वापरासाठीचे व्यावसायिक सिलेंडर कंपनी भरणार नाही, फक्त घरगुती सिलेंडर भरले जातील. सिलेंडर भरण्यासाठी चाकण येथील कंपनीकडे गेलेले ट्रक गॅस न भरताच परत पाठवण्यात आले आहेत. त्यामुळे शिल्लक असलेल्या साठ्यानंतर व्यावसायिक गॅसचा पुरवठा अडचणीचा होईल. या निर्णयामुळे औद्योगिक वापरासह सामान्य लोकांनाही काही अडचणींचा सामना करावा लागू शकतो.”
गॅस कंपन्यांच्या निर्णयामुळे काही दिवसांसाठी व्यावसायिक वापरासाठी गॅस मिळण्यात अडचण निर्माण होईल, तर घरगुती वापरासाठी गॅसची उपलब्धता कायम ठेवण्यासाठी हा निर्णय घेण्यात आला आहे.
