जळगाव मिरर | २८ जानेवारी २०२४
देशभर प्रजासत्ताक दिनाची धामधूम सुरु असतांना दुसऱ्या दिवशी छत्रपती संभाजीनगर जिल्ह्यातून एक धक्कादायक बातमी समोर आली आहे. २२ वर्षीय गर्भवती महिला पल्लवी दिनेश गाडेकर यांचा विहिरीत पडून मृत्यू झाला आहे. हि घटना कन्नड तालुक्यातल्या मोहरा येथे घडल्याने परिसरातून हळहळ व्यक्त होत आहे.
मिळालेल्या माहितीनुसार, कन्नड तालुक्यातल्या मोहरा येथील दिनेश गाडेकर हे सैन्यदलात कर्तव्य बजावत असतांना दि.२७ रोजी शनिवारी दुपारच्या सुमारास मोहरा शिवारात डोंगराच्या पायथ्याशी राहत असलेले गाडेकर परिवारातील पल्लवी ९ महिन्यांच्या गर्भवती असतांना पल्लवी दुपारी घराबाहेर पडल्या. मात्र, खूप वेळ होऊनही त्या परतल्या नाही. कुटुंबियांनी शोधाशोध घेतली असता, त्यांचा मृतदेह राजेंद्र गाडेकर यांच्या गट नंबर १५० मधील विहिरीत मृतदेह आढळून आला.
दरम्यान, पल्लवी यांच्या मृत्यूची वार्ता गावात वाऱ्यासारखी पसरली. घटनेची माहिती मिळताच गावकऱ्यांनी तातडीने घटनास्थली धाव घेत पल्लवी यांचा मृतदेह विहिरीबाहेर काढला. त्यांना रुग्णालयात दाखल केले असता, डॉक्टरांनी मृत घोषित केले. या प्रकरणी पिशोर पोलीस ठाण्यात आकस्मिक मृत्यूची नोंद करण्यात आली आहे.
