जळगाव मिरर | १४ फेब्रुवारी २०२५
आई घराबाहेर बसलेली असतांना चेतन रविंद्र सोनवणे (वय २८, रा. चिमुकले बालाजी मंदिराजवळ अयोध्या नगर) या तरुणाने घरात गळफास घेत आत्महत्या केली. ही घटना गुरुवार दि. १३ रोजी दुपारच्या सुमारास घडली. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
सविस्तर वृत्त असे कि, शहरातील अयोध्या नगरातील चिमुकले बालाजी मंदिर परिसरात राहणारा चेतन सोनवणे हा ट्रॅव्हल्सवर कामाला होता. त्याठिकाणी काम करुन कुटुंबाला हातभार लावित होता. गुरुवारी दुपारी त्याची आई घराबाहेर बसलेली असतांना चेतन याने घरात गळफास घेत आपली जीवनयात्रा संपविली.
काही वेळानंतर त्याची आई घरात गेली असता, त्यांना चेतन हा गळफास घेतलेल्या अवस्थेत दिसून आला. त्यांनी हंबरडा फोडीत आक्रोश केला. परिसरातील नागरिकांनी त्यांच्या घराकडे धाव घेत चेतनला खाली उतरवून तात्काळ जिल्हा शासकीय वैद्यकीय महाविद्यालय व रुग्णालयात दाखल केले. याठिकाणी वैद्यकीय अधिकाऱ्यांनी तपासणी करत मयत घोषीत केले. चेतनच्या आत्महत्येचे कारण अस्पष्ट असून याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
