जळगाव मिरर | १५ डिसेंबर २०२३
देशभरातून साईभक्त राज्यातील शिर्डी येथे येत असतात त्याच भक्तांसाठी एक महत्वाची बातमी समोर आली आहे. अहमदनगर जिल्ह्यातील शिर्डी येथील साईबाबा मंदिर दर्शन, आरती पासची उच्च दरात विक्री होत असल्याची माहिती समोर आली होती. या प्रकरणातील अहवालाची गंभीर दखल घेऊन उच्च न्यायालयाने दर्शन व आरती पासेस काढण्यासाठी आधार बंधनकारक केले आहे. कार्ड दर्शन, आरती पास देण्यासाठी प्रत्येक भक्ताची माहिती घ्यावी. तसेच, दर्शन, आरती पासवर आधार क्रमांक नमूद करावा, असे न्यायालयाने मंदिर प्रशासनाला दिले आहेत.
उच्च न्यायालयाने, जिल्हा न्यायाधीश, अहमदनगर तथा अध्यक्ष यांनी सादर केलेल्या गोपनीय अहवालामधील गंभीर निरीक्षणे लक्षात घेता मंदिराच्या सुरक्षेसंदर्भात काही एक बदल न करता सर्व सुरक्षाव्यवस्था प्रधान जिल्हा न्यायाधीश तथा अध्यक्षांच्या आदेशानुसारच चालेल अथवा बदलेल असे निर्देश दिले. उच्च न्यायालयाचे न्या. रवींद्र व्ही घुगे व न्या. वाय. जी. खोब्रागडे यांनी आदेशाची अंमलबजावणी न केल्यास तो उच्च न्यायालयाचा आदेशाचा अवमान समजला जाईल, असेदेखील आदेशात म्हटले आहे.
