जळगाव मिरर | ४ ऑक्टोबर २०२३
जळगाव शहरातील एका १४ वर्षीय विद्यार्थ्याने अभ्यासाच्या तणावातून गळफास घेत आत्महत्या केली. मयत विद्यार्थ्याचे तन्मय गजेंद्र पाटील असे नाव आहे. मंगळवार, 3 ऑक्टोबर रोजी रात्री ही घटना समोर आली. याप्रकरणी जिल्हापेठ पोलिस ठाण्यात अकस्मात मृत्यूची नोंद करण्यात आली आहे. मृत्यूपूर्वी विद्यार्थ्याने सुसाईड नोट लिहिली आहे.
मिळालेल्या माहितीनुसार, जळगाव शहरातील गणेश कॉलनी परिसरात तन्मय गजेंद्र पाटील(वय १४) हा विद्यार्थी आपल्या आई, वडील अॅड.गजेंद्र पाटील आणि मोठा भाऊ ओम यांच्यासोबत राहत होता. तो ए.टी. झांबरे माध्यमिक विद्यालयाचा दहावीच्या वर्गात शिक्षण घेत होता. गेल्या काही दिवसांपासून तो अभ्यासाच्या तणावात होता. दि. ३ ऑक्टोबर मंगळवार रोजी रात्री जेवण करून सर्वजण झोपले असताना त्याने छताला गळफास घेतला. शासकीय वैद्यकीय महाविद्यालय व रुग्णालयात तन्मयला नेले असता वैद्यकीय अधिकारी डॉ. अदित्य साळुंखे यांनी मयत घोषित केले. आत्महत्या करण्यापूर्वी त्याने सुसाईड नोट लिहून ठेवली. अभ्यासाच्या तणावातून त्याने आत्महत्या केल्याचे समोर येत आहे.