जळगाव मिरर | २६ ऑक्टोबर २०२५
धरणगाव तालुक्यातील एक खळबळजनक घटना उघडकीस आली आहे. तरुण-तरुणी कुठल्याही ठिकाणी रील काढायला मागेपुढे बघत नाही. यामुळे आपला जीव जाऊ शकतो याची देखील चिंता या रील काढणाऱ्यांना नसते. अशीच एक घटना पाळधी या रेल्वे स्थानकाजवळ घडली आहे. या रीलच्या नादात दोन तरुणांना आपला जीव गमावा लागला आहे. मोबाईलवर व्हिडिओ (रील) बनवण्याचा मोह दोन शाळकरी मित्रांसाठी जीवघेणा ठरल्याची अत्यंत दुर्दैवी घटना रविवारी 25 ऑक्टोबर रोजी सकाळच्या सुमारास धरणगाव तालुक्यातील पाळधी चांदसर रेल्वे गेटजवळ घडली आहे. धावत्या रेल्वेसमोर धोकादायक पद्धतीने रील शूट करत असताना अहमदाबाद-हावडा एक्स्प्रेसने धडक दिल्याने या दोन तरुणांचा जागीच मृत्यू झाला.
मिळालेल्या माहितीनुसार, या भीषण अपघातात मयत झालेल्या तरुणांची नावं प्रशांत पवन खैरनार (वय 18 वर्षे) आणि हर्षवर्धन महेंद्र नन्नवरे (वय 18 वर्षे) अशी आहेत. दोघेही पाळधी येथील महात्मा फुले नगर, प्लॉट भाग (रेल्वे गेट जवळील प्लॉट) येथील रहिवासी होते. पाळधी चांदसर रेल्वे गेटजवळ दोघे तरुण रेल्वे ट्रॅकवर रील तयार करत होते. यावेळी धरणगावकडून जळगावकडे जाणाऱ्या अहमदाबाद-हावडा एक्स्प्रेस गाडीची त्यांना धडक बसली. हा अपघात इतका भीषण होता की दोन्ही तरुणांचा जागीच मृत्यू झाला. त्यांच्या निष्काळजीपणामुळे व साहसी कृत्यामुळे त्यांना आपला जीव गमवावा लागला.
सदर घटनेची माहिती मिळताच पाळधी पोलीस तातडीने घटनास्थळी दाखल झाले. पोलिसांनी पंचनामा करण्याची प्रक्रिया सुरू केली आहे. या घटनेमुळे पाळधी परिसरात मोठी हळहळ व्यक्त होत असून, तरुणांमध्ये वाढणाऱ्या धोकादायक ‘रील’ बनवण्याच्या प्रवृत्तीवर पुन्हा एकदा गंभीर प्रश्नचिन्ह निर्माण झाले आहे. रील काढण्याच्या नादात तरुण बेभान होऊन कुठल्याही थराला जाऊन रील बनवत आहेत. काही गुंडागर्दीचे रील तर काही दहशत निर्माण होतील, अशा पद्धतीने रील बनवत जात आहे. मात्र, हे रील बनवताना किती धोकादायक असू शकतात याचं भान देखील हे तरुण विसरून जात असतात आणि अशाच कृतीमुळे आज या दोघ तरुणांना आपला जीव गमावा लागला आहे
