जळगाव मिरर | ११ मे २०२६
महाराष्ट्र राज्य पोलिस दलासाठी आयोजित करण्यात आलेल्या राज्यस्तरीय ट्रेनिंग ऑफ ट्रेनर प्रशिक्षण कार्यक्रमात जळगाव जिल्हा पोलिस दलाने उल्लेखनीय कामगिरी करत तीन सुवर्ण पदके आणि दोन कांस्य पदके पटकावली आहेत. या यशामुळे जळगाव पोलिस दलाचे राज्यभर कौतुक होत आहे.
महाराष्ट्र राज्याचे पोलिस महासंचालक यांच्या संकल्पनेतून राज्यातील पोलिस अधिकारी आणि अंमलदार यांच्यासाठी ट्रेनिंग ऑफ ट्रेनर कार्यक्रम आयोजित करण्यात आला होता. या प्रशिक्षणाचा उद्देश पोलिस अधिकारी व कर्मचाऱ्यांना शस्त्र हाताळणी, सुरक्षा आणि दहशतवाद, नक्षलवाद तसेच गंभीर गुन्हेगारी घटनांना तोंड देण्यासाठी सक्षम बनविणे हा होता. राज्य राखीव पोलिस बल गट क्रमांक-१, पुणे येथे हे प्रशिक्षण पार पडले. दि. ४ मे २०२६ ते ९ मे २०२६ या कालावधीत झालेल्या या प्रशिक्षणात राज्यातील विविध जिल्ह्यांतील पोलिस अधिकारी व कर्मचारी सहभागी झाले होते.
जळगाव जिल्हा पोलिस दलाकडून राखीव पोलिस उपनिरीक्षक सचिन विचवे, पोलिस उपनिरीक्षक मुजफ्फर सय्यद, सहाय्यक पोलिस उपनिरीक्षक सोमनाथ पाटील, पोलिस कर्मचारी रज्जाक सय्यद, संतोष सुरवाडे, मेघना जोशी, किरण सपकाळे, संदीप पाटील, समीर पठाण आणि प्रियांका टेकरे यांनी सहभाग नोंदविला होता.
या प्रशिक्षणात राखीव पोलिस उपनिरीक्षक सचिन विचवे यांनी “शिकवणी” प्रकारात ८३ गुण मिळवत प्रथम क्रमांकासह सुवर्ण पदक पटकावले. पोलिस उपनिरीक्षक मुजफ्फर सय्यद यांनी “शिकवणी” प्रकारात ७७ गुणांसह तृतीय क्रमांक मिळवत कांस्य पदकावर नाव कोरले. तसेच पोलिस अंमलदार समीर पठाण यांनी “आंतर वर्ग फायरिंग” प्रकारात ८७ गुणांसह प्रथम क्रमांक मिळवत सुवर्ण पदक मिळविले. याचबरोबर “उत्कृष्ट प्रशिक्षार्थी” म्हणून ३३७/४०० गुणांसह प्रथम क्रमांक पटकावत आणखी एक सुवर्ण पदक जिंकले. एकूणच जळगाव पोलिस दलाच्या पथकाने उत्कृष्ट कामगिरी करत “प्रथम क्रमांक विजेता संघ” म्हणूनही सुवर्ण पदक मिळविले.
या यशाबद्दल जळगाव जिल्ह्याचे पोलिस अधीक्षक श्रीकांत धिवरे, अपर पोलिस अधीक्षक संदीप गावित, पोलिस उपअधीक्षक प्रदीप बागुल आणि राखीव पोलिस निरीक्षक प्रशांत सुरवाडे यांच्या उपस्थितीत सर्व विजेत्या अधिकारी व कर्मचाऱ्यांचा सत्कार करण्यात आला. जळगाव पोलिस दलाच्या या यशामुळे जिल्ह्याच्या शिरपेचात मानाचा तुरा रोवला गेला असून पोलिस दलात आनंदाचे वातावरण आहे.
