जळगाव मिरर | २२ ऑक्टोबर २०२३
जळगाव शहरात गेल्या महिन्याभरापासून अनेक अल्पवयीन मुलासह प्रौढ देखील गळफास घेत आपली जीवनयात्रा संपविल्याच्या अनेक घटना घडत असतांना नुकतेच शहरातील एका 55 वर्षीय व्यक्तीने राहत्या घरात दि.२१ रोजी दुपारी गळफास घेतल्याची धक्कादायक घटना घडली आहे. घरी आल्यानंतर पतीचा मृतदेह बघताच त्यांच्या पत्नीने एकच आक्रोश केला. याप्रकरणी शनिपेठ पोलीस ठाण्यात अकस्मात मृत्यूची नोंद करण्यात आली आहे. हि घटना शहरातील जुने जळगावातील विठ्ठलपेठ परिसरात घडली आहे.
मिळालेल्या माहितीनुसार, शहरातील विठ्ठलपेठ परिसरात दशरथ पाटील यांनी सहा महिन्यांपुर्वी घेतलेल्या घरात पत्नीसह राहत होते, तर त्यांचा मुलगा मामाकडे वास्तव्यास आहे. पेंटर काम करुन आपला उदनिर्वाह करीत होते. शनिवारी त्यांची पत्नी कंपनीत कामावर गेलेली असताना दशरथ पाटील यांनी घराच्या वरच्या मजल्यावर गळफास घेतला. संध्याकाळी त्यांच्या पत्नी कामावरून घरी आल्यानंतर त्यांना आपल्या पती गळफास घेतलेल्या अवस्थेत दिसले.
त्यांचा लटकलेला मृतदेह बघताच त्यांनी मन हेलावणारा आक्रोश केला. घटनेची माहिती शनिपेठ पोलिसांना मिळाल्यानंतर पोलिसांनी पंचनामा करुन मृतदेह शासकीय वैद्यकीय महाविद्यालय व रुग्णालयात दाखल केला. याठिकाणी डॉक्टरांनी त्यांना मयत घोषित केले. मयत दशरथ पाटील यांच्या पश्चात पत्नी, मुलगा असा परिवार आहे. याप्रकरणी शनिपेठ पोलीस ठाण्यात अकस्मात मृत्यूची नोंद करण्यात आली आहे.
