जळगाव मिरर | २८ जून २०२६
भरघोस नफ्याचे आमिष दाखवत भुसावळ येथे वास्तव्यास असलेल्या ३० वर्षीय तरुणाची तब्बल ९७ लाख ५० हजार रुपयांची ऑनलाइन फसवणूक केल्याचा धक्कादायक प्रकार उघडकीस आला आहे. ‘विलास पाटील’ नावाने संपर्क साधून विश्वास संपादन करणाऱ्या सायबर ठगाने गुंतवणुकीच्या नावाखाली ही रक्कम उकळल्याचा आरोप असून, याप्रकरणी जळगाव सायबर पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार हा बुलढाणा जिल्ह्यातील रहिवासी असून खाजगी नोकरीनिमित्त भुसावळ येथे वास्तव्यास आहे. २५ जूनपासून ‘विलास पाटील’ असे नाव सांगणाऱ्या व्यक्तीने मोबाईलद्वारे त्याच्याशी वारंवार संपर्क साधला. संबंधिताने आपल्या मोबाईल क्रमांकावर नाव आणि छायाचित्र वापरून तक्रारदाराचा विश्वास संपादन केला. यानंतर विविध गुंतवणूक योजनांमधून मोठा आर्थिक नफा मिळवून देण्याचे आमिष दाखवत त्याने तक्रारदाराकडून वेळोवेळी ऑनलाइन व्यवहारांद्वारे ९७ लाख ५० हजार रुपये स्वीकारले. काही दिवसांनी तक्रारदाराने नफ्यासह मूळ रक्कम परत मिळविण्यासाठी संपर्क साधला असता संबंधिताने प्रतिसाद देणे बंद केले. तसेच गुंतवलेली रक्कमही परत न मिळाल्याने आपली फसवणूक झाल्याचे तक्रारदाराच्या लक्षात आले.
यानंतर तक्रारदाराने जळगाव सायबर पोलिस ठाण्यात धाव घेत तक्रार दाखल केली. पोलिसांनी प्राथमिक चौकशीनंतर अज्ञात सायबर ठगाविरुद्ध ऑनलाइन फसवणुकीचा गुन्हा दाखल केला असून पुढील तपास पोलीस निरीक्षक प्रदीप ठाकूर करीत आहेत. दरम्यान, कोणत्याही अनोळखी व्यक्तीच्या सांगण्यावरून किंवा सोशल मीडियावरील आकर्षक गुंतवणूक योजनांवर विश्वास ठेवून मोठ्या रकमेचे व्यवहार करू नयेत, असे आवाहन सायबर पोलिसांनी नागरिकांना केले आहे.
