जळगाव मिरर | २९ मार्च २०२६
भोंदू अशोक खरातच्या कथित रॅकेट प्रकरणातील चौकशीसाठी एसआयटीने राज्य महिला आयोगाच्या माजी अध्यक्षा रुपाली चाकणकर यांना समन्स बजावले आहे. या समन्समुळे त्यांच्यावर चौकशी व नंतर अटकेची शक्यता निर्माण झाली आहे, असे राष्ट्रवादीच्या नेत्या रुपाली ठोंबरे पाटील यांनी सांगितले.
रुपाली चाकणकर यांनी अशोक खरातशी असलेल्या कथित संबंधांमुळे आयोगाचे अध्यक्षपद आणि नंतर महिला प्रदेशाध्यक्षपदावरून राजीनामा दिला होता. या प्रकरणात सुषमा अंधारे (शिवसेना उपनेते) आणि रुपाली ठोंबरे पाटील यांनी पोलिसांना भेटून त्यांना सहआरोपी करण्याची मागणी केली होती.
टीव्ही 9च्या वृत्तानुसार, रुपाली चाकणकर यांना भोंदू खरातच्या शिवनिका संस्थान ट्रस्टमध्ये सदस्य असल्यामुळे समन्स बजावण्यात आले आहे. ट्रस्टमधील सर्व आजी-माजी सदस्यांची चौकशी होणार आहे.
भाजपचे महसूल मंत्री चंद्रशेखर बावनकुळे यांनी यावर प्रतिक्रिया देताना सांगितले की, “समन्स म्हणजे चौकशीचा भाग आहे; काहीतरी मोठे घडलं नाही.”
रुपाली ठोंबरे पाटील यांनी म्हटले की, रुपाली चाकणकर कायद्याने या प्रकरणात सहआरोपी आहेत, कारण त्यांचा ट्रस्टमधील सहभाग, पोलिसांवर दबाव, आणि आयोगाच्या अध्यक्ष म्हणून हितसंबंध लक्षात घेता त्यांना चौकशीसह कोर्टात हजर करणे आवश्यक आहे.
