मुक्ताईनगर प्रतिनिधी | प्रणित काठोके
तालुक्यातील हरताळा परिसरात वीज वितरणाच्या डीपीमध्ये झालेल्या शॉर्टसर्किटमुळे शेतातील केळीच्या बागेला भीषण आग लागून मोठे नुकसान झाल्याची घटना मंगळवार, दिनांक 28 एप्रिल 2026 रोजी दुपारी सुमारे 2.30 वाजण्याच्या सुमारास घडली. या आगीत सुमारे 5 एकर 31 आर क्षेत्रावरील केळीचे पीक जळून खाक झाले असून शेतकऱ्यांना तब्बल ₹10 लाखांहून अधिक आर्थिक फटका बसला आहे.
मिळालेल्या माहितीनुसार, हरताळा येथील डीपी क्रमांक 4227890 अंतर्गत शेतगट क्रमांक 452/ब मधील शेतात अचानक शॉर्टसर्किट होऊन ठिणग्या पडल्या. त्यानंतर काही क्षणातच आग भडकली आणि केळीच्या बागेसह ठिबक सिंचन यंत्रणा, प्लास्टिक पाइप आणि अन्य साहित्य जळून खाक झाले. आग इतकी भीषण होती की काही वेळातच संपूर्ण बाग ज्वाळांनी वेढली गेली.
या आगीत झालेल्या नुकसानीचा तपशील पुढीलप्रमाणे आहे: केळीचे पीक (5 एकर 31 आर) : ₹9,00,000, ठिबक नळी व साहित्य : ₹25,000, प्लास्टिक पाइप : ₹16,000 , स्करटिंग कॅरीबॅग साहित्य : ₹20,000, इतर नुकसान : ₹50,000 असा एकूण दहा लाखांपर्यंत नुकसान झाले आहे.
सुदैवाने या घटनेत कोणतीही जीवितहानी झाली नाही. मात्र शेतकऱ्यांचे मोठ्या प्रमाणात आर्थिक नुकसान झाले असून त्यांच्यावर मोठा आर्थिक भार पडला आहे. घटनेची माहिती मिळताच संबंधित महसूल व वीज वितरण विभागाच्या अधिकाऱ्यांनी घटनास्थळी धाव घेत पंचनामा केला आहे. तसेच या प्रकरणी पुढील तपास सुरू असून शेतकऱ्यांना तात्काळ मदत मिळावी, अशी मागणी स्थानिकांकडून होत आहे. दरम्यान, उन्हाळ्याच्या पार्श्वभूमीवर अशा प्रकारच्या घटनांमध्ये वाढ होत असल्याने वीज वितरण यंत्रणेने आवश्यक ती काळजी घेणे गरजेचे असल्याची भावना नागरिकांमध्ये व्यक्त होत आहे.
