जळगाव मिरर | २८ जून २०२४
आई-वडील कामाला गेलेले असतांना घरी एकटाच असलेल्या ध्रुव ललित बऱ्हाटे (वय १७, रा. सरस्वतीनगर) या युवकाने गळफास घेत आत्महत्या केली. ही घटना गुरुवारी दुपारच्या सुमारास उघडकीस आली. त्याच्या आत्महत्येचे कारण अस्पष्ट असून याप्रकरणी शनीपेठ पोलीस ठाण्यात अकस्मात मृत्यूची नोद करण्यात आली.
सविस्तर वृत्त असे कि, भुसावळ रोडवरील सरस्वती नगरात ध्रुव बऱ्हाटे हा आई, वडील, लहान भाऊ यांच्यासह वास्तव्याला होता. त्याचे वडील एका हॉटेलमध्ये कामगार म्हणून तर आई शहरातील एका नामांकीत सोन्याच्या दुकानात काम करुन कुटुंबाचा उदनिर्वाह करतात. ध्रुव हा इयत्ता बारावी विज्ञान शाखेमध्ये मु.जे. महाविद्यालय येथे शिक्षण घेत होता. गुरुवार २७ जून रोजी सकाळी नेहमीप्रमाणे ध्रुवचे आई-वडील हे कामाला निघून गेले. त्यानंतर सकाळी ध्रुव हा घरी एकटाच होता. त्याने घरामध्ये एका खोलीत स्वतःला गळफास लावून घेत आपली जीवनयात्रा संपविली. दुपारी १२ वाजेच्या सुमारास त्याचा लहान भाऊ शाळेतून घरी आला, त्यावेळेला भाऊ दरवाजा उघडत नाही म्हणून त्याने शेजारील नागरिकांना सांगितले. त्यावेळेला परिसरात राहणारे त्याचे नातेवाईक यांनी धाव घेतली. त्यांनी खिडकीतून पाहिले असता ध्रुव हा गळफास घेतलेल्या अवस्थेत दिसून आला.
शेजारच्यांनी दरवाजा तोडून ध्रुव याला तात्काळ शासकीय वैद्यकीय महाविद्यालय व रुग्णालयात दाखल केले. याठिकाणी वैद्यकीय अधिकारी डॉ. माधुरी सोसे यांनी तपासणीअंती मयत घोषित केले. यानंतर कुटुंबीयांनी एकाच हंबरडा फोडत आक्रोश केला. शासकीय रुग्णालयामध्ये नातेवाईकांची गर्दी जमा झाली होती. शनिपेठ पोलीस स्टेशनला अकस्मात मृत्यूची नोंद करण्यात आली आहे.
