जळगाव मिरर | २० डिसेंबर २०२३
जळगाव जिल्ह्यात गेल्या काही महिन्यापासून वाळूमाफियांचा जोर वाढत आहे. अनेक भागात कारवाई होत आहे तर काही भागात हि कारवाई नाममात्र सुरु असल्याचे देखील दिसत असतांना नुकतेच वाळूवाहतूक करणाऱ्या ट्रॅक्टरला प्रांताधिकारी यांनी अडवण्याचा प्रयत्न केला असता ट्रॅक्टरचालकाने प्रांताधिकाऱ्यांच्या गाडीला धडक दिली. तर त्यांच्या सोबत असलेल्या तलाठी यांना शिवीगाळ करुन ठार मारण्याची धमकी दिली. या प्रकरणी ट्रॅक्टर चालकाला पोलिसांनी ताब्यात घेतले आहे. तर या प्रकरणावरुन चोपड्यात अवैध वाळू वाहतूकदारांची मुजोरी वाढल्याचे दिसून येते.
मिळालेल्या माहितीनुसार, चोपडा येथील प्रांताधिकारी एकनाथ बंगाळे हे जळगाव येथील मीटिंग संपवून दुपारी साडेतीन वाजेच्या सुमारास भोकर – खेडीभोकरी मार्गे चोपड्याकडे येत होते. या वेळी त्यांना खडगाव येते अवैधरित्या वाळू भरलेले ट्रॅक्टर दिसले. या वेळी प्रांतांनी खडगावजवळ तलाठी गुलाबसिंग पावरा यांना पुढे माहिती देऊन ट्रॅक्टर थांबवण्यासाठी सांगितले. या वेळी तलाठी गुलाबसिंग पावरा यांनी ट्रॅक्टर चालक राजेश मालवे याला अडवण्याचा प्रयत्न केला असता ट्रॅक्टर चालकाने ट्रॅक्टर न थांबवता उलट त्यांना शिवीगाळ करत तसेच ठार मारण्याची धमकी देत ट्रॅक्टर पुढे नेले. दरम्यान, प्रांताधिकारी एकनाथ बंगाळे यांनी ट्रॅक्टरच्या पुढे स्वतःच्या ताब्यातील कार (एमएच- २०, एफवाय ०२१६) उभी केली असता ट्रॅक्टर चालक राजेश विकास मालवे (वय २३ रा. खरग, ता. चोपडा) याने प्रांताधिकारी गाडीत बसलेले आहेत, असे माहित असूनही त्याने ट्रॅक्टर (एमएच १९, बीजी- ८०७६) ने प्रांतांच्या गाडीला मागून जबर धडक झाले असून प्रांताधिकारी भंगाळे यांच्या उजव्या हाताच्या बोटाला किरकोळ दुखापत झाली आहे. ही घटना १९ रोजी दुपारी ३.३० वाजेच्या सुमारास तालुक्यातील खडगाव येथे घडली. या घटनेवरून चोपड्यात अवैध वाळू वाहतूक दारांची मुजोरी वाढल्याचे दिसून येत आहे.
या प्रकरणी प्रांताधिकारी एकनाथ बंगाळे यांच्या फिर्यादीवरून चालक राजेश विकास मालवे व ट्रॅक्टर मालक सुरेंद्र कोळी (रा. चोपडा) यांच्याविरुद्ध कलम ३५३, ३७९, ५०४, ५०६ अन्वये ग्रामीण पोलीस ठाण्यात गुन्हा दाखल करण्यात आला आहे. या वेळी नायब तहसिलदार सचिन बांबळे यांच्यासह मंडळ अधिकारी, तलाठी, महसूलचे कर्मचारी पोलीस ठाण्यात उपस्थित होते. चालक राजेश याला पोलिसांनी ताब्यात घेतले आहे.