मुक्ताईनगर प्रतिनिधी | प्रणित काठोके
कायदा व सुव्यवस्था अबाधित ठेवण्यासाठी मुक्ताईनगर पोलीस स्टेशनकडून अलीकडील काळात जोरदार कारवाई करण्यात आली असून विविध गुन्ह्यांवर प्रभावी आळा घालत उल्लेखनीय कामगिरी बजावण्यात आली आहे.
पोलीसांनी केलेल्या कारवाईत हातभट्टी दारू संदर्भात 3 केसेस व दारूबंदी अंतर्गत 3 केसेस दाखल करण्यात आल्या असून या कारवायांत एकूण सुमारे ₹2 लाख 25 हजारांचा मुद्देमाल जप्त करण्यात आला आहे. जुगारविरोधी मोहिमेत 5 केसेस दाखल करून ₹28 हजारांचा मुद्देमाल जप्त करण्यात आला. वाहतूक नियमांचे उल्लंघन करणाऱ्यांवरही पोलीसांनी कडक कारवाई केली. मोटार वाहन कायद्यांतर्गत 58 केसेस नोंदवून ₹39,500 दंड वसूल करण्यात आला. तसेच ड्रंक अँड ड्राईव्हच्या 3 प्रकरणांमध्ये कारवाई करून 3 वाहने जप्त करण्यात आली आहेत.
सार्वजनिक ठिकाणी तंबाखूजन्य पदार्थ सेवन करणाऱ्यांवर 22 केसेस दाखल करण्यात आल्या. याशिवाय वॉन्टेड असलेल्या 4 आरोपींना अटक करण्यात आली असून अवैध शस्त्र बाळगणाऱ्या 1 आरोपीला तसेच तडीपार असलेल्या 1 आरोपीलाही अटक करण्यात आली आहे.
रात्रीच्या वेळी संशयास्पदरीत्या फिरणाऱ्या प्रकरणात 1 केस दाखल करून 4 आरोपींना अटक करण्यात आली. चोरीच्या संशयावरून 1 आरोपीला ताब्यात घेण्यात आले आहे. तसेच ‘मिसिंग’ मोहिमेअंतर्गत हरवलेल्या 3 महिलांचा शोध घेण्यात पोलीसांना यश आले आहे.
या सर्व कारवायांमुळे परिसरातील गुन्हेगारीवर नियंत्रण ठेवण्यात मोठी मदत झाली असून नागरिकांमध्ये सुरक्षिततेची भावना निर्माण झाली आहे. मुक्ताईनगर पोलीस स्टेशनच्या या उल्लेखनीय कामगिरीबद्दल सर्व स्तरातून कौतुक व्यक्त होत आहे.
