जळगाव मिरर | ९ ऑगस्ट २०२५
गेल्या काही दिवसापासून जळगाव मनपातील अधिकारी आपल्या कारनाम्याने चर्चेत असतांना आता चक्क आपल्या विरुद्धची तक्रार मागे घेण्यासाठी महापालिकेच्या प्रमुख वैद्यकिय अधिकारी डॉ. विजय घोलप यांनी पाठवलेल्या ठेकेदाराने बंदूक दाखवून धमकी दिल्याचे लैंगिक छळ प्रकरणातील तक्रारदार महिलेने म्हटले आहे. तक्रार मागे घेण्यासाठी महिला तक्रार निवारण समितीच्या सदस्य असलेल्या महिलेनेच धमकावल्याचा आरोपही त्यांनी साक्षीत केला आहे.
मनपातील महिला अधिकाऱ्याचा डॉ. विजय घोलपकडून होणाऱ्या लैंगीक छळ प्रकरणात चौकशीतून अनेक पैलू समोर येत आहेत. तक्रारदार महिलेने सहा पानी जबाबातून अनेक गौप्यस्फोट केले आहेत. एकूण ११४७ शब्दांच्या जबाबातून तक्रारदाराने आपबिती व्यक्त करत डॉ. घोलप याला नोकरीतून काढून टाकत पोलिसात गुन्हा दाखल करण्याची मागणी केली आहे. मनपाच्या वैद्यकीय विभागातील आपल्या सहकारी अधिकाऱ्याचा लैंगिक छळ केल्याचा आरोप निलंबीत प्रमुख वैद्यकीय अधिकारी डॉ. विजय घोलप यांच्यावर आहे. १८ जून रोजी आयुक्तांकडे लेखी तक्रार दाखल झाली आहे. त्यानंतर महापालिकेतील महिला कर्मचाऱ्यांच्या सुरक्षेविषयी प्रश्नचिन्ह उपस्थित झाले होते. दरम्यान, दीड महिन्यांच्या कालावधीनंतर डॉ. घोलप यांच्यावर निलंबनाची कारवाई करण्यात आली आहे. तक्रारदार महिला अधिकाऱ्याची साक्ष शुक्रवारी (८ ऑगस्ट) नोंदवण्यात आली. यात त्यांनी त्यांच्या छळाची आपबिती कथन केली आहे. डॉ. घोलप हा इच्छेविरूध्द शरीर संबंधाची मागणी करणे, घाणेरडे सुचक इशारे, फ्लाईंग किस, हात लावण्याचा प्रयत्न करणे तसेच हावभाव करून छेडखानी करीत असल्याचे त्यात म्हटले आहे. नोकरी जाण्याची तसेच बदनामी होण्याच्या भीतीमुळे हा त्रास अनेक महिने सहन करीत होते. परंतु आता असहाय्य झाल्यामुळे तक्रार केल्याचे त्यांनी म्हटले आहे.
डॉ. घोलप याने तक्रारदाराला माफीनामा फाडून टाकण्याचे तसेच समितीसमोर खोटे सांगण्यासाठी धमकावण्याचा व घाबरवण्याचा प्रयत्न केल्याचा आरोप आहे. महापालिकेच्या तक्रार निवारण समितीने या प्रकरणी डॉ. घोलपवर कठोर व नोकरीतून काढून टाकण्याची कारवाई ताकदीने करावी अशी मागणी करत समितीच्या माध्यमातून पोलिस ठाण्यात गुन्हा दाखल करण्याची विनंतीही संबंधित महिला अधिकाऱ्याने दिलेल्या जबाबात केली आहे. तसे केले तरच भविष्यात महानगरपालिकेमध्ये कोणत्याही महिला कर्मचाऱ्याला त्रास होणार नाही आणि न्याय मिळेल असेही या साक्षीत म्हटले आहे.
आयुक्तांकडे केलेली तक्रार मागे घेण्यासाठी डॉ. घोलप यांनी वेगवेगळ्या माध्यमातून दबाव आणल्याचे महिला तक्रारदाराचे म्हणणे आहे. आपल्याच कार्यालयातील स्टाफला घरी पाठवणे, पतीच्या कार्यालयात स्वतः जाऊन धमकावणे यासह कार्यालयात बंदूक बाळगलेल्या कॉन्ट्रॅक्टरकडून धमकी दिल्याचेही साक्षीत नमूद केले आहे. त्यामुळे बंदूक दाखवणारा तो कॉन्ट्रॅक्टर नेमका कोण ? हा देखिल तपासाचा मुद्दा राहणार आहे. महिला तक्रार निवारण समितीची माजी सदस्य असलेल्या प्रगती चोंदकाले यांनीही तक्रार मागे घेण्यासाठी दबाव आणल्याचे जबाबात म्हटले आहे. त्यामुळे दबाव आणणाऱ्या कर्मचाऱ्यांवर काय कारवाई केली जाते, हे येणाऱ्या काळात स्पष्ट होणार आहे.
