जळगाव मिरर | ३१ डिसेंबर २०२५
जुन्या भांडणाच्या कारणावरून जळगाव तालुक्यातील बोरनार येथे एका तरुणावर कोयत्याने हल्ला करून त्याचा जीवेठार मारण्याचा प्रयत्न केल्याची घटना दि. २८ डिसेंबर रोजी घडली. या प्रकरणी एमआयडीसी पोलिस ठाण्यात चार जणांविरुद्ध गुन्हा दाखल करण्यात आला असून पुढील तपास सुरू आहे.
सविस्तर वृत्त असे की, जुन्या वादातून राकेश पाटील यांना शिवीगाळ करत जगन्नाथ पाटील (वय ३८, रा. बोरनार, ता. जळगाव) याने धारदार कोयत्याने त्यांच्या पार्श्व भागावर वार केला. या हल्ल्यात राकेश पाटील गंभीर जखमी झाले. जखमी राकेश यांनी एमआयडीसी पोलिस ठाण्यात दिलेल्या फिर्यादीवरून प्रेम गोपाल धनगर, चेतन, रोहित (दोघांची पूर्ण नावे समजू शकली नाहीत) व एका अनोळखी इसमाविरुद्ध गुन्हा दाखल करण्यात आला आहे.
दरम्यान, बोरनार येथेच घडलेल्या आणखी एका घटनेत चेतन किरण परदेशी (वय १९, रा. अमळनेर) या तरुणाला कृष्णा हरिदास कोळी व पवन रमेश कोळी यांनी लाकडी दांडक्याने मारहाण करून दुखापत केली. तसेच राकेश किरण परदेशी याने मारहाण करण्यासाठी प्रोत्साहन दिल्याची फिर्याद चेतन परदेशी याने दिली आहे. त्यानुसार संबंधित तिघांविरुद्धही गुन्हा दाखल करण्यात आला असून पोलिसांकडून दोन्ही घटनांचा तपास सुरू आहे.
