जळगाव मिरर | ३ मे २०२६
जळगाव जिल्ह्यात कायदा व सुव्यवस्था राखण्यासाठी पोलिस प्रशासनाकडून विशेष सर्च मोहीम राबविण्यात आली. पोलीस अधीक्षक श्रीकांत धिवरे यांच्या मार्गदर्शनाखाली दिनांक २ मार्च २०२६ रोजी रात्री ११ ते २ या वेळेत ही कारवाई करण्यात आली.
गुन्हेगारी पार्श्वभूमी असलेले व्यक्ती बार, हॉटेल व धाब्यांवर एकत्र येत असल्याच्या पार्श्वभूमीवर जिल्ह्यातील सर्व पोलीस ठाण्यांना एकत्रित कारवाईचे आदेश देण्यात आले होते. त्यानुसार विशेष पथके तयार करून विविध ठिकाणी अचानक तपासणी करण्यात आली. या मोहिमेदरम्यान ९ एनडीपीएस गुन्हे नोंदविण्यात आले. १९६ व्यक्तींवर कारवाई करण्यात आली असून १ तलवार जप्त करण्यात आली. एकूण २२३ हॉटेल व धाब्यांची तपासणी करण्यात आली, तर २ हॉटेलधारकांवर कारवाई करण्यात आली. तसेच ४७ प्रतिबंधात्मक कारवाया करण्यात आल्या.
याशिवाय १० इतर गुन्ह्यांची नोंद करण्यात आली असून त्यामध्ये ४ दारूबंदी कायद्यांतर्गत, ५ मोटार वाहन कायद्यानुसार आणि १ ड्रिंक अँड ड्राईव्हचा समावेश आहे. ही कारवाई अपर पोलीस अधीक्षक कविता नेरकर व संदीप गावित यांच्या मार्गदर्शनाखाली जिल्ह्यातील सर्व पोलीस अधिकारी व कर्मचाऱ्यांनी केली.
