जळगाव मिरर | १६ फेब्रुवारी २०२६
दरमहा २० हजार रुपये पोटगी देण्याचे न्यायालयाचे आदेश दिल्याचा राग मनात धरून उपनिरीक्षकाच्या घरावर पेट्रोल टाकून जाळण्याचा प्रयत्न करण्यात आल्याचा धक्कादायक प्रकार उघडकीस आला आहे. या प्रकरणाचा पर्दाफाश स्थानिक गुन्हे शाखेने करत मुख्य सूत्रधारासह तिघांना अटक केली असून संशयितांकडून चोरीच्या नऊ दुचाकी जप्त करण्यात आल्या आहेत.
मुंबई येथे कार्यरत असलेले उपनिरीक्षक पाचोरा तालुक्यातील नगरदेवळा येथे आई व बहिणीसह वास्तव्यास आहेत. काही दिवसांपूर्वी मध्यरात्री त्यांच्या घरावर दुचाकीवरून आलेल्या दोघांनी तोंडाला रुमाल बांधून पेट्रोल टाकत आग लावण्याचा प्रयत्न केला होता. त्यावेळी घरात आई व बहिण झोपलेल्या होत्या. सुदैवाने मोठी दुर्घटना टळली; मात्र या घटनेमुळे परिसरात भीतीचे वातावरण निर्माण झाले होते.
प्रकरणी गुन्हा दाखल होताच जिल्हा पोलिस अधीक्षक डॉ. महेश्वर रेड्डी यांच्या मार्गदर्शनाखाली स्थानिक गुन्हे शाखेने तपास सुरू केला. पोलिस निरीक्षक राहुल गायकवाड यांच्या नेतृत्वाखालील पथकाने सलग पाच दिवस गावातील तसेच परिसरातील सीसीटीव्ही फुटेजची तपासणी केली. तांत्रिक विश्लेषणाद्वारे संशयितांची ओळख पटविण्यात आली.
तपासात पोलिसांच्या रेकॉर्डवरील गुन्हेगार गणेश बाबुराव पाटील (रा. कळमसरा) व समाधान बळीराम निकम यांची नावे समोर आली. दोघांनी शेंदुर्णी येथील पेट्रोलपंपावरून बाटलीत पेट्रोल घेतल्याचे सीसीटीव्हीतून स्पष्ट झाले. त्यानुसार गणेश पाटील याला ताब्यात घेण्यात आले असता, चौकशीत धक्कादायक माहिती समोर आली.
या गुन्ह्याचा सूत्रधार हा उपनिरीक्षकाचा मेव्हणा राहुल वसंतसिंग पाटील (रा. जामनेर) असल्याचे निष्पन्न झाले. राहुल पाटील आणि उपनिरीक्षकाची बहिण किरण राऊळ यांच्यात न्यायालयीन वाद सुरू असून न्यायालयाने राहुल याला दरमहा २० हजार रुपये पोटगी देण्याचे आदेश दिले होते. त्याचा सूड उगवण्यासाठी आणि पत्नीच्या मनात भीती निर्माण करण्याच्या उद्देशाने राहुलने गणेश पाटील व समाधान निकम यांना दोन लाख रुपयांची सुपारी दिली होती. त्यापैकी एक लाख रुपये आगाऊ देण्यात आल्याची कबुली संशयितांनी दिली.
तांत्रिक तपासाद्वारे राहुल पाटील याला ताब्यात घेऊन कसून चौकशी केली असता, त्याने कट रचल्याची कबुली दिली. या तिघांकडून चोरीच्या नऊ दुचाकी जप्त करण्यात आल्या असून ते सराईत गुन्हेगार असल्याचे पोलिस तपासात समोर आले आहे.
या कारवाईत स्थानिक गुन्हे शाखेचे अधिकारी व सायबर सेलच्या पथकाने सहभाग घेतला असून पुढील तपास सुरू आहे.
