जळगाव मिरर | २९ नोव्हेंबर २०२५
जिल्हाधिकारी रोहन घुगे यांनी नुकतेच पाल येथील गार्डन, वन उद्यान, विश्रामगृह, डॉरमेट्री आणि पर्यटक निवास यांसह सातपुडा जंगल सफारीची पाहणी करून सर्व सुविधा व चालू कामांचा सविस्तर आढावा घेतला.
उपवनसंरक्षक जमीर शेख, सहाय्यक वनसंरक्षक समाधान पाटील, प्रोजेक्ट ऑफिसर यावल यांच्यासह अन्य अधिकाऱ्यांच्या उपस्थितीत झालेल्या या पाहणीत जिल्हाधिकाऱ्यांनी उद्यानाच्या पुढील विस्तार व विकासासाठी आवश्यक सूचना केल्या.
थंड हवेमुळे प्रसिद्ध असलेल्या पाल परिसरात पर्यटनाची मोठी शक्यता असल्याचे त्यांनी नमूद केले. गावापासून सहा किलोमीटर अंतरावर वन विभागाने सुरू केलेल्या सातपुडा जंगल सफारीची त्यांनी स्वतंत्र पाहणी करून आतापर्यंत झालेल्या कामांचा आढावा घेतला. सफारीत स्थानिकांना JFM मार्फत उपलब्ध झालेल्या रोजगाराबाबतही त्यांनी थेट कर्मचाऱ्यांकडून अनुभव जाणून घेतला.
सफारीतील मार्गदर्शक व्यवस्था, वाहतूक, सुविधा विस्तार, पर्यटकांसाठी सुरक्षितता आणि पर्यावरण संवर्धन याबाबत काही सुधारणा सुचवून जिल्हाधिकाऱ्यांनी पर्यटन विकासाला गती देण्याचे निर्देश दिले. या पाहणीदरम्यान वनपरिक्षेत्र अधिकारी श्रीकांत काळे तसेच इतर कर्मचारी उपस्थित होते.
