जळगाव मिरर | २२ मार्च २०२६
महाराष्ट्रातील सत्ताधारी तसेच विरोधी पक्षांमध्ये चर्चेचा केंद्रबिंदू बनलेल्या अशोक खरात प्रकरणात नवा वळण आलं आहे. राज्य महिला आयोगाच्या माजी अध्यक्ष रुपाली चाकणकर यांच्यावर राष्ट्रवादीच्या नेत्यांनी गंभीर आरोप केले आहेत. राष्ट्रवादीच्या नेत्या रुपाली ठोंबरे पाटील यांनी रुपाली चाकणकर यांना महाराष्ट्रातील सर्वात मोठ्या सेक्स रॅकेटच्या सूत्रधार असल्याचा सनसनाटी आरोप केला असून, त्यांना या प्रकरणात मुख्य आरोपी करण्याची मागणी मुख्यमंत्री देवेंद्र फडणवीस यांच्याकडे केली आहे.
रुपाली ठोंबरे पाटील यांनी मुख्यमंत्री फडणवीस यांना पाठवलेल्या पत्रात म्हटले आहे की, अशोक खरात यांचा पर्दाफाश करणे आणि त्याच्या गैरकृत्यांना उघडकीस आणणे ही एक मोठी कामगिरी आहे, परंतु या प्रकरणामागे रुपाली चाकणकर यांचा सक्रिय सहभाग असून त्यांनी पदाचा दुरुपयोग करून अशोक खरात याला संरक्षण दिले आहे.
पत्रात ठोंबरे पाटील म्हणतात की, रुपाली चाकणकर यांनी भोंदूबाबा अशोक खरात याच्या गैरकृत्यांबाबत अनेक वेळा पोलिसांवर दबाव टाकून खोटे गुन्हे दाखल केले, तसेच त्याला वाचवण्यासाठी अनेक ठिकाणी प्रयत्न केले. २९ डिसेंबर २०२५ रोजी नाशिक ग्रामीण वावी पोलिस ठाण्यात लैंगिक शोषणाचा व्हिडीओ व्हायरल होऊ नये म्हणून पोलिसांवर दबाव टाकून गुन्हा दाखल करण्यास लावल्याचा आरोपही पत्रात करण्यात आला आहे.
याशिवाय शिर्डी पोलिस स्टेशनवर फोन करून अशोक खरात याला वाचवण्याचा प्रयत्न केल्याचा उल्लेखही केला आहे. त्यामुळे या प्रकरणात रुपाली चाकणकर यांचा प्रत्यक्ष सहभाग असल्याचे स्पष्ट झाल्याचे ठोंबरे पाटील यांनी म्हटले आहे.
रुपाली ठोंबरे पाटील यांनी राज्यातील तमाम महिलांच्या वतीने विनंती केली आहे की, रुपाली चाकणकर यांच्याविरुद्ध त्वरित आणि कठोर कारवाई होऊन त्यांना अटक करण्यात यावी, तसेच या प्रकरणातील सत्य उघड करावे.
या आरोपांमुळे रुपाली चाकणकर यांच्या राजीनाम्यानंतर आता त्यांच्या राजकीय कारकिर्दीतही मोठे संकट उभे राहण्याची शक्यता आहे. विरोधकांच्या तीव्र टीकेखाली येत असलेल्या रुपालींच्या पदावरून पुढील कारवाई होण्याची दाट शक्यता असताना, या प्रकरणाचा पुढील तपास कसा पुढे जातो याकडे सर्वांचं लक्ष लागलं आहे.
