अमळनेर : विक्की उत्तम जाधव
अमळनेर बाजार समितीचे सभापती अशोक आधार पाटील यांनी शासनाच्या पोखरा योजनेंतर्गत शेडनेट योजनेत कोट्यावधींचा भ्रष्टाचार करीत अनेक शेतकऱ्यांची फसवणूक केली आहे. त्यांनी अनुदानाचे पैसे लाटल्याने शेतकऱ्यांना शासनाचे इतर लाभ मिळत नाही आणि त्यांच्या नावावर लाखोंचा बोजा पडला आहे, यात त्यांच्या शालकासह शिंदखेडा तालुक्यातील एकाचा समावेश आहे, असा आरोप शरद पवार गटाचे तालुकाध्यक्ष सचिन बाळू पाटील यांनी पत्रकार परिषदेत केला.
शासनाने नानाजी कृषी संजीवनी योजनेंतर्गत शेतकऱ्यांना सक्षम करण्याच्या उद्देशाने शेडनेट योजना सुरू केली आहे. सचिन पाटील यांनी पत्रकार परिषदेत काही शेतकऱ्यांना देखील उपस्थित ठेवले होते. कैलास दगा पाटील (रा. फापोरे ) यांनी यावेळी माहिती दिली की २० गुंठ्याची संमती असताना ४० गुंठ्यांवर कर्ज काढून शेडनेट केले. अशोक पाटील यांनी २५ लाखाचे इस्टिमेट केले. मात्र शेडनेटचे साहित्य निकृष्ट दर्जाचे फक्त दोन लाखाचे होते. याबाबत मी कृषी विभाग, आमदारांकडे देखील तक्रार केली. पण कुणीच दखल घेतली नाही. कन्हेरे येथील यशोदाबाई पाटील, दिनेश दगा पाटील, कन्हेरे येथील नारायण रघुनाथ पाटील, राजेश पाटील, यांनी तक्रारी केल्या व अरुण भागवत यांनी देखील शेडनेट ला निकृष्ट साहित्य वापरले अपूर्ण साहित्य आहे असे सांगितले. सचिन पाटील म्हणाले की या भ्रष्टाचारात अशोक पाटील यांचे शालक समाधान शेलार तसेच शिंदखेडा तालुक्यातील सोनेवाडी येथील ओम ॲग्रोचे उद्धव पाटील यांचा समावेश असून कृषी अधिकारी वेळोवेळी चौकशीला गेले नाहीत. बँकेचे अधिकारी देखील या गैरव्यवहारात आहेत असा आरोप करून सखोल चौकशीची मागणी केली. पत्रकार परिषदेच्यावेळी उबाठा शिवसेनेचे शहरउपप्रमुख अनंत निकम, कमलबाई पाटील, प्रियांका पाटील, सचिन वाघ, सनी गायकवाड हे हजर होते. पोखरा योजना हि शासन ते शेतकरी अशी ऑनलाईन व्यवहाराची आहे. कृषी विभागामार्फत मंजुरी दिल्यानंतर शासनाच्या यादीतील एजंसी मार्फेत शेडनेट बांधले जाते. अनुदान थेट शेतकऱ्यांच्या आधार कार्डशी लिंक असलेल्या खात्यात जमा होत असते.
सरकारी योजना असल्याने यात कुठल्याही खाजगी व्यक्तीचा संबध येत नाही आणि माझी एजन्सी पण नाही. त्यामुळे माझा यात कुठलाही संबध येत नाही. पाटील हे सभापती पदाचे प्रतीस्पर्धी उमेदवार असल्याने ते राजकीय द्वेशापोटी त्यांनी आरोप केले असून माझी विनाकारण बदनामी केल्यास मी कायदेशीर कारवाई करेल अशी प्रतिक्रिया अशोक आधार पाटील यांनी दिली आहे.